Artta qalǵan óńirlerdi respýblıkalyq bıýdjetten qarjylandyrýǵa basymdyq beriledi — Bozymbaev
ASTANA. KAZINFORM — Úkimet óńirlerdi ornyqty jáne teńgerimdi damytý maqsatynda óńirlik damýynyń 2025-2030 jyldarǵa arnalǵan tujyrymdamasyn bekitti.
Tujyrymdama týraly tolyǵyraq Premer-mınıstrdiń orynbasary Qanat Bozymbaev aıtyp berdi.
— Tujyrymdama halyqtyń ómir súrý sapasyn arttyrýǵa jáne makroóńirler men ósý núkteleri negizinde óńirlerdiń ekonomıkalyq áleýetin ashýǵa baǵyttalǵan. Áleýmettik, ınjenerlik jáne kólik obektilerine qol jetkizýdegi dısproportsııalardy joıýǵa erekshe nazar aýdarylady. Artta qalǵan óńirlerge óńirlik standarttar júıesi negizinde respýblıkalyq bıýdjetten qarjylandyrýǵa basymdyq beriledi, — dedi Qanat Bozymbaev Úkimet úıinde ótken baspasóz máslıhatynda.
Sondaı-aq Úkimet basshysynyń orynbasary monoqalalardy damytýdyń jańa sharasy ázirlengenin aıtty.
— Onyń ishinde iri kásiporyndar men jergilikti taýar óndirýshiler arasynda uzaq merzimdi shart jáne ofteık-kelisimshart jasasý, ındýstrııalyq aımaq qurý, elishilik qundylyq baǵdarlamasyn engizý, shaǵyn jáne orta bıznesti damytý taǵy sol sııaqty. Sonymen qatar Úkimet Alataý qalasyn qalyptastyrý jáne damytý boıynsha belsendi jumys júrgizip jatyr. Búginde Alataý qalasynyń bas jospary bekitildi, arnaıy ekonomıkalyq aımaq jáne qalany damytý jónindegi jobalaý keńsesi quryldy. Qazir kommýnıkatsııanyń tehnıkalyq jobasy ázirlenip jatyr, — deıdi ol.
Odan ári Qanat Bozymbaev aýyldy damytýdy sóz etti.
— Aýyldy damytýǵa baǵyttalǵan barlyq memlekettik shara, onyń ishinde «Aýyl amanaty» jáne «Aýyl — el besigi» jobasyn ilespe iske asyrý qamtamasyz etiledi. Bıyl «Aýyl amanaty» jobasy boıynsha 50 mlrd teńge bólindi, budan basqa 2026-2028 jyldarǵa arnalǵan respýblıkalyq bıýdjetti qalyptastyrý sheńberinde shamamen 450 mlrd teńge bólý josparlanyp otyr. Atalǵan shyǵyn sheńberinde 25 myńǵa jýyq joba qarjylandyryp, 100 myńnan astam jumys orny qurylady. Óńirlik damý jónindegi jumysty úılestirý Úkimet janyndaǵy jobalaý keńsesi sheńberinde júzege asyrylady, — dep tolyqtyrdy vıtse-premer.
Buǵan deıin óńirlik standarttar júıesine sáıkes kórsetkishteri joǵary nemese tómen óńirlerge sholý jasaǵan edik.