Artsport qaýymdastyǵy úıirmelerdi jekeleı tekserýge daıyn

NUR-SULTAN. QazAqparat – Artsport qyzmetin usynýshylar qaýymdastyǵy qyzmetin sapasyn kórsetetin úıirmelerdi jekeleı tekserýge daıyn. Bul týraly «Artsport» jobasyna qatysty qoǵamdyq tyńdaý barysynda atalǵan qaýymdastyqtyń tóraǵasy Lana Bolat aıtty, dep habarlaıdy QazAqparat tilshisi.

Aıta keterligi, is-shara barysynda QR Mádenıet jáne sport mınıstrligi Mádenıet komıteti tóraǵasynyń orynbasary Kúmis Seıitova memlekettik sport jáne shyǵarmashylyq tapsyrysty oryndaýǵa qatysatyn jeke kásipkerlik sýbektileri zań buzýshylyq úshin ákimshilik jaýapkershilik belgileý usynylyp otyrǵanyn aıtqan edi.

Alaıda Jetkizýshiler qaýymdastyǵy mınıstrlik usynyp otyrǵan bul normaǵa narazylyǵyn bildirdi.

«Qujatta memleket tarapynan baqylaý tetigi múldem bolmaıtyndyǵy aıtylǵan. Túptep kelgende QR Ákimshilik kodeksinde bilim berý, dene tárbıesi jáne sport salasyndaǵy el zańnamasyn buzýǵa qatysty bap bar. Oryn alýy múmin zań buzýshylyqtardyń bári zańnamada qarastyrylǵan. Biz memlekettik organdarmen birge ózin-ózi retteıtin uıymǵa kóshý jumystaryn bastaýdy usynamyz. Jetkizýshilerdiń ózin-ózi retteıtin uıymdary josyqsyz jetkizýshileri qadaǵalap. Ol týraly ákimdikke nemese mınıstrlikke aqparat berip otyrady. Osylaısha, biz jaýapkershilikti moınymyzǵa alýǵa daıynbyz», - dedi Lama Bolat.

Sonymen qatar ol Mádenıet mınıstrligi usynǵan saraptamalyq derekter shynaıy sandarmen sáıkespeıtindigin aıtady.

«Qujatta 3 621 jetkizýshi jaıynda sóz qozǵalady. Іs júzinde platforma saraptamasyna sáıkes olardyń sany – 9 057. 2021 jyly sporttyq tapsyrysqa 6 mlrd 367 mln, 2022 jyly 16 mlrd 354 mln, 2021 jyly shyǵarmashylyq tapsyrysqa 4 mlrd 898 mln, 2022 jyly 14 mlrd 487 mln teńge bólindi. Qaýymdastyq platformany ázirleýshilermen jasalǵan memorandým aıasynda statıstıkalyq derekterdi únemi qadaǵalap otyrady. Óıtkeni, naqty málimetter ǵana saraptamalyq jumystardy durys júrgizýge jáne qajetti bıýdjetti bekitýge múmkindik beredi. Qujatta jetkizýshiler tarapynan zańnamanyń óreskel buzylǵandyǵyna qatysty kóptegen derektiń bar ekeni aıtylady. Biz tekserýdi kim jáne qashan júrgizgendigine qatysty naqty málimetter alyp, Bas prokýratýranyń, ishki ister organdarynyń shyǵyn somasyna, buzýshylyqqa jol bergenderdiń aty-jónine qatysty qorytyndymen tanysqymyz keledi. Qyzmetterdiń sapaly kórsetilgenine múddelimiz. Biraq, qoǵamdyq monıtorıng buzýshylyqtardyń anyqtalmaǵanyn kórsetip otyr», - dedi ol.