ArtSport baǵdarlamasyna bólingen qarajattyń 2,5 mlrd teńgesi qoldy boldy - Erbolat Dosaev

ALMATY. QazAqparat – ArtSport baǵdarlamasy aıasynda balanyń úıirmege kelgenin tekseretin QR-kod paıda bolady. Bul týraly Almaty ákimi Erbolat Dosaev Alataý aýdany turǵyndarymen kezdesý barysynda aıtty, dep habarlaıdy QazAqparat tilshisi.

Kezdesý barysynda aýdan turǵyny úıirmelerge qatysty másele kóterdi.

«Alataý aýdanynda 23 yqsham aýdan bar. Birde-bireýinde mýzyka, sport, qolóner mektebi joq. Qala ortalyǵyna tasý múmkin emes. Sondyqtan, ArtSport máselesin sheshseńizder», - dep ótinish bildirdi ol.

Ákim balalardyń shyǵarmashylyǵyn damytý máselesi sheshimin tabatynyn, sondaı-aq ArtSport baǵdarlamasy boıynsha QR-kod engiziletin jetkizdi.

«Men óz baıandamamda jazǵa deıin jańa ǵımarat ashylatynyn aıttym. Balalardyń baratyn jeri bolady. Kún saıyn 5 myń bala degen az emes. Al, ArtSport máselesi boıynsha endi QR-kod qoldanysqa engiziledi. Sebebi, ótken jyly Almaty qalasyna 20 mlrd teńge bólgenbiz. Onyń 2,5 mlrd teńgesi qoldy bolyp ketti. Qazir is sotta qaralyp jatyr. Jalpy, balanyń úıirmege qatysqan, qatyspaǵanyn tekserý úshin QR-kod kerek», - dedi Erbolat Dosaev.

Aıta ketsek, bıyl balalar úıirmelerine 16 mlrd 200 mıllıon teńge bólingen, sonyń ishinde Alataý aýdanyna 2 mlrd 300 mıllıon teńge baǵyttaldy.

Eske salaıyq, Almaty ákimi Erbolat Dosaev ArtSport baǵdarlamasy qarjy máselesine baılanysty ýaqytsha toqtatylǵanyn málimdegen bolatyn.

Sondaı-aq, Almaty qalasy prokýrorynyń birinshi orynbasary Nursultan Raqyshev ArtSport baǵdarlamasy boıynsha 6 qylmystyq is qozǵaýǵa negiz bar ekeni týraly aıtqan edi.