ArtSport baǵdarlamasy boıynsha 6 qylmystyq is qozǵaýǵa negiz bar - prokýror
Onyń aıtýynsha, Bas prokýratýranyń tapsyrmasy boıynsha Almaty qalasynyń prokýratýrasy ArtSport baǵdarlamasyna qatysty tekserý júrgizip jatyr. Sonyń nátıjesinde aıtarlyqtaı zań buzýshylyqtar anyqtaldy, 6 qylmystyq is qozǵaýǵa negiz bar.
«Bireýiniń materıaldary alynyp, qylmystyq is qozǵaldy, qalǵanyna aýdıt, tıisti saraptamalar taǵaıyndadyq, birneshe mıllıon bıýdjet qarajatyn jymqyrý anyqtaldy. Munda bıýdjet qarjysyn urlaý úshin naqty shema qoldanylǵanyn kórip otyrmyz. Biz osy baǵdarlamanyń jumysyn qoldanystaǵy zańnamaǵa sáıkes retteýimiz kerek», - dedi Nursultan Raqyshev.
Sonymen qatar, ol búgingi kúni prokýrorlyq qadaǵalaý aktileri engizilgenin atap ótti.
«Buǵan deıin sport sektsııalary men úıirmelerde buryn sottalǵan jáne túrli qylmys úshin jaýapqa tartylǵan 10-nan astam jattyqtyrýshy sabaq bergeni týraly aıtqanbyz. 3 myńnan astam bala shetelde bolsa da, qaǵaz júzinde úıirmege tirkelgen, 5myń sabaq ótkizilmegen. Bul rette, eńbek sharttaryn jasaspaǵan, zeınetaqy aýdarymdary júrgizilmegen jattyqtyrýshylardyń ózderine qatysty da eńbek quqyqtarynyń buzylýyna jol berilgen. Birneshe mln dollar zalal keltirildi. Tekserý áli jalǵasyp jatyr», - deıdi prokýror.
Buǵan qosa, júıeniń jumysyna qatysty máseleler de bar.
«Qazir biz tekserý komıssııasymen birlesip, baqylaý-qadaǵalaý organdaryna joq JSN, basqa oblystarda turatyn balalar jáne taǵy basqa alaıaqtyqtyń jolyn kesý úshin baǵdarlamanyń ózine tehnıkalyq aýdıt júrgizýdi pysyqtap jatyrmyz. Jaqynda sońǵy nátıjeleri shyǵady», - dep atap ótti qala prokýrorynyń birinshi orynbasary Nursultan Raqyshev.
Eske salsaq, buǵan deıin Erbolat Dosaev 1 qyrkúıekten bastap ArtSport baǵdarlamasyn qarjylandyrý toqtatylatyny týraly aıtqan bolatyn.
Keıin atalǵan baǵdarlama boıynsha bıýdjet qarajatyn jymqyrý faktisi anyqtaldy.