Artsport baǵdarlamasy: Qyzylorda oblysynda burynǵy mektep dırektory jalǵan qujattar usynǵan

QYZYLORDA. KAZINFORM - Qyzylorda oblysynda burynǵy mektep dırektory «Artsport» baǵdarlamasy boıynsha jalǵan qujattar usynyp, memleketke 13,3 mln teńge shyǵyn keltirgen.

Qyzylorda oblystyq prokýratýrasy tarapynan memlekettik tapsyrys aıasynda «Damý bala» platformasyna tirkelgen shyǵarmashylyq úıirmeler men sporttyq sektsııalarǵa bólingen qarjy jaǵdaıy zerdelenip jatyr. Sońǵy úsh jylda oblystyq bıýdjetten bul maqsatta 11,6 mlrd teńge ıgerilgen.

- Qyzylorda oblysy prokýrorynyń ókimimen quqyq qorǵaý, jergilikti atqarýshy jáne ýákiletti organdardyń ókilderinen jumysshy toby quryldy. Atalǵan top jumysy qarjy kóp bólingen Qyzylorda qalasy, Shıeli, Jańaqorǵan, Syrdarııa aýdandarynan bastaldy. Zerdeleý barysynda birqatar eleýli buzýshylyqtar anyqtalyp, tıisti sharalar qabyldanýda. Máselen, Shıeli aýdanynda burynǵy mektep dırektory balalarynyń atyna tirkelgen mekemeler arqyly memlekettik sporttyq jáne shyǵarmashylyq tapsyrysqa jalǵan qujattardy usynǵan. Saldarynan bıýdjetke 13,3 mln teńge shyǵyn kelgen. Bul boıynsha oblystyq sybaılas jemqorlyqqa qarsy qyzmeti tarapynan QR Qylmystyq kodekstiń 190-baby boıynsha (3-bóliginiń 1), 2) 3) tarmaqtarymen) sotqa deıingi tergep-tekserý bastaldy, - dedi Qyzylorda oblysynyń prokýrory Rızabek Ojarov. 

Vedomstvo málimetishe, jalpy úıirmelerge qatyspaǵan 2 myńnan astam bala anyqtalǵan. Saldarynan memleketke 450 mln teńgege jýyq zalal kelgen. Búgingi kúnge naqty kásipkerlermen memleketke 48 mln. teńge qaıtaryldy.

- Sondaı-aq Jańaqorǵan aýdanynda 19 úıirmeniń ózinen 127 mln teńgege buzýshylyqtar anyqtalyp, búginde 41 mln teńge memleketke qaıtaryldy. Syrdarııa aýdanynda 77 mln teńgege buzýshylyqtar tirkelip, 7 mln teńge qarjynyń memleketke qaıtarylýy qamtamasyz etildi, - dep tolyqtyrdy oblys prokýrory.

Eske salsaq, budan buryn Qyzylordada jol qurylysyna qatysty eki tehnıkalyq qadaǵalaýshy lıtsenzııasynan aıyryldy.