Artline Kazakhstan komandasy Ispanııadaǵy avtojarysta óner kórsetedi
ASTANA.KAZINFORM – Qazaqstandyq Artline Kazakhstan kásibı avtosport komandasy Ispanııada ótetin Lamborghini Super Trofeo Europe jarysynyń besinshi kezeńinde óner kórsetedi.
Komanda baspasóz qyzmetiniń habarlaýynsha, baıraqty báseke 10–12 qazan kúnderi Ispanııadaǵy Barselona-Katalýnıa avtodromynda ótedi. Otandastarymyz Shota Abhazava men Egor Orýdjev Pro Am sanatynda komanda namysyn qorǵaıdy.
Aıta keterligi, qazaqstandyq komanda 20 shilde Italııadaǵy Misano avtodromynda GT2 European Series kezeńinde chempıon atansa, 31 tamyz kúni Germanııadaǵy Nıýrbýrgrıng trassasynda ótken Lamborghini Super Trofeo Europe jarys serııasynyń tórtinshi kezeńinde eki kúmis júldeni qanjyǵalady.
Lamborghini Super Trofeo – Lamborghini Squadra Corse uıymdastyrǵan halyqaralyq avtojarys serııasy. Avtojarys Eýropa, Azııa jáne Soltústik Amerıka qurlyǵynda ótip, shabandozdar 6 kezeń 2 maıdan (50 mınýt) jarysyp, fınaldyq kezeńdi ózara sarapqa salady.
Sonymen qatar bul avtojarysta Huracán Super Trofeo Evo modeldik kólikteri qoldanylady.
Osyǵan deıin habarlaǵanymyzdaı, elordadaǵy 40-stantsııa arenasynda erekshe avtoshoý ótti.