Artline Kazakhstan komandasy álemdik avtojarystyń fınalynda baq synaıdy
ASTANA. KAZINFORM – Artline Kazakhstan avtosport komandasy Lamborghini Super Trofeo serııasynyń Eýropalyq jáne álemdik fınalynda óner kórsetedi.
Qazaqstandyq komanda baspasóz qyzmetiniń habarlaýynsha, baıraqty báseke 6-9 qarasha kúnderi Italııanyń Mısano halyqaralyq avtojarys alańynda ótedi.
Aıta keterligi, ArtLine Kazakhstan komandasy eki fınaldyq jarysqa da qatysyp, otandastarymyz Shota Abhazava men Egor Orýdjev Pro Am sanatynda komanda namysyn qorǵaıdy.
Lamborghini Super Trofeo – Lamborghini Squadra Corse uıymdastyrǵan halyqaralyq avtojarys serııasy. Eýropa, Azııa jáne Soltústik Amerıka qurlyǵyndaǵy týrnırde shabandozdar 6 kezeńde 2 jarys alańynda (50 mınýt) synǵa túsip, fınaldyq kezeńdi ózara sarapqa salady.
Sonymen qatar bul avtojarysta Huracán Super Trofeo Evo modeldik kólikteri qoldanylady.
Osyǵan deıin habarlaǵanymyzdaı, qazaqstandyq komanda 31 tamyz kúni Germanııadaǵy Nıýrbýrgrıng trassasynda ótken Lamborghini Super Trofeo Europe jarys serııasynyń tórtinshi kezeńinde eki kúmis júldeni qanjyǵalady.