Artqy kórinis kamerasyndaǵy aqaýǵa baılanysty Ford shamamen 1,7 mln kólikti keri qaıtaryp jatyr
ASTANA. KAZINFORM - Ford Motor Company artqy kórinis kamerasynyń beınesin kórsetýge qatysty aqaýlarǵa baılanysty shamamen 1,74 mln avtokólikti keri qaıtarý boıynsha eki naýqan bastalǵanyn habarlady, dep jazady Kazinform agenttigi Associated Press deregine silteme jasap.
AQSh-tyń National Highway Traffic Safety Administration (NHTSA) jarııalaǵan qujattarǵa sáıkes, keıbir Ford Bronco jáne Ford Edge modelderindegi mýltımedıalyq júıeniń ishki komponenti qyzyp ketip, isten shyǵýy múmkin. Sonyń saldarynan kólik keri júrgen kezde ekranda artqy kameranyń beınesi shyqpaı qalady.
Sonymen qatar Ford Escape, Lincoln Corsair, Lincoln Aviator jáne Ford Explorer modelderiniń bir bóliginde artqy kameranyń beınesi tóńkerilip nemese keri baǵytta kórsetilýi yqtımal.
Keri qaıtarý naýqanyna 849 310 dana Bronco jáne Edge, sondaı-aq 889 950 dana Escape, Corsair, Aviator jáne Explorer avtokólikteri kiredi. Ford kompanııasynyń baǵalaýynsha, atalǵan aqaýlar osy kólikterdiń barlyǵynda bolýy múmkin. Sonymen birge NHTSA qujattaryna sáıkes, bul máselege baılanysty jaraqat alý nemese jol-kólik oqıǵalary tirkelmegen.
Degenmen NHTSA eki aqaý da jol-kólik oqıǵasynyń qaýpin arttyrýy múmkin ekenin eskertti.
Bronco jáne Edge ıeleri úshin avtokontsern baǵdarlamalyq qamtamasyz etýdi tegin jańartýdy usynady. Ielerine habarlamalar naýryzdyń sońynda jiberiledi, al jańartýdy dıler arqyly nemese qashyqtan ornatýǵa bolady.
Escape, Corsair, Aviator jáne Explorer modelderine qatysty máseleni sheshý joly ázirge ázirlenip jatyr. Aldaǵy aılarda kólik ıelerine qaýipsizdikke qatysty yqtımal táýekelder týraly aldyn ala habarlamalar joldanady.
Buǵan deıin Ford Motor Company órt shyǵý qaýpine ákelýi múmkin aqaýǵa baılanysty shamamen 119 myń avtokólikti keri qaıtaryp jatqanyn habarlaǵan edi.
Sondaı-aq BMW órt shyǵý qaýpine baılanysty júzdegen myń avtokólikti keri qaıtaryp jatqany týraly jazdyq.
