Artyq salmaqqa birdeı tarıf: FlyArystan-ǵa qatysty tergeý bastaldy
ALMATY. KAZINFORM – Almatyda monopolııaǵa qarsy organ FlyArystan áýe kompanııasyna qatysty tergeý bastady. Oǵan sebep – qol júginiń artyq salmaǵy úshin biryńǵaı tarıftiń qoldanylýy. Qazirgi tártip boıynsha, jolaýshy 1 keli nemese 5 keli artyq salmaq úshin birdeı kólemde aqy tóleıdi.
Bul týraly óńirlik kommýnıkatsııalar qyzmetinde ótken brıfıngide QR Básekelestikti qorǵaý jáne damytý agenttiginiń Almaty boıynsha departament basshysy Nurjan Nurlanuly málimdedi. Onyń aıtýynsha, ózge áýe kompanııalardyń tájirıbesi artyq salmaqty naqty mólsherine qaraı saralap, tólemdi soǵan sáıkes esepteýge bolatynyn kórsetip otyr.
– Bizdiń paıymdaýymyzsha, mundaı tásilden bas tartý tutynýshylardyń keıbiriniń quqyǵyna nuqsan keltirýi múmkin, - dedi Nurjan Nurlanuly.
Onyń sózinshe, buǵan deıin áýe kompanııasynyń atyna básekelestikti qorǵaý salasyndaǵy zańnamany buzý belgileriniń bar ekeni týraly habarlama joldanǵan. Alaıda ol talaptar oryndalmaǵan. Osyǵan baılanysty qazirgi ýaqytta tergeý júrgizilip jatyr. Tergeý qorytyndysy boıynsha tıisti sheshim qabyldanady.
Buǵan deıin áýe kompanııasy 2026 jylǵy 1 naýryzdan bastap jolaýshylarǵa qol júgin 5 keli ornyna 7 kelige deıin alyp júrýge ruqsat beriletinin habarlaǵan edi.
Eske salaıyq, 2026 jylǵy 24 qańtarda FlyArystan ushaǵy qustarmen soqtyǵysyp, tekserýden keıin qaıta ushqanyn habarlaǵanbyz.