«Artemıda II» ekıpajy Jerden eń alysqa uzaǵan «Apollon-13»-tiń rekordyn jańartty
ASTANA. KAZINFORM – «Artemıda II» ekıpajy Jerden eń alys qashyqtyqqa ushý boıynsha 1972 jylǵy tarıhı rekordty jańartty, dep habarlaıdy Anadolý.
252 752 mıl! Bul – adamzat tarıhyndaǵy jańa ǵaryshtyq beles. «Artemıda II» ekıpajy Jerden buryn-sońdy adam barmaǵan eń alys qashyqtyqqa jetti.
Bul týraly AQSh-tyń Ulttyq aeronavtıka jáne ǵarysh keńistigin zertteý basqarmasy (NASA) X áleýmettik jelisinde málimdedi.
– Bul 1970 jyly «Apollon-13» ornatqan aldyńǵy rekordtan shamamen 4 102 mılge artyq, – dedi jazba avtorlary.
Ǵarysh kemesi «Orıon» 6 sáýir kúni Aıdyń tartylys órisine sátti endi. «Artemıda II» mıssııasy aıasynda astronavtar Jer serigin aınalyp ushýy tıis.
Bir táýlik ishinde astronavtar Aıdyń arǵy betinen 7 500 shaqyrymǵa deıin jaqyndap, Jer men Aıdy bir mezette kórý múmkindigine ıe bolady. Sonymen qatar olar Kún tutylýyn da tamashalaı alady.
Mıssııa barysynda qatysýshylar avtonomdy rejımde alty kúnge deıin tynys alýdy qamtamasyz etetin jańa skafandrlardy synaqtan ótkizedi.
Osylaısha, «Artemıda II» 1972 jyldan bergi Aıǵa baǵyt alǵan alǵashqy pılottyq ekspedıtsııa atanyp otyr.
Eske sala ketsek, «Orıon» kemesi ǵaryshqa 1 sáýir kúni ushyryldy. Bortta amerıkalyq astronavtar Rıd Ýaısmen, Vıktor Glover, Krıstına Kýk, sondaı-aq Kanada ǵarysh agenttiginiń astronavty Djeremı Hansen bar. Bul – 1972 jyldan beri Aıǵa baǵyttalǵan alǵashqy pılotty keme.
«Artemıda II» mıssııasynyń maqsaty – «Orıon» júıelerin alys ǵarysh jaǵdaıynda synaqtan ótkizý, sondaı-aq Aıdyń ústinen ushý kezinde ony qujattap fotoǵa túsirý.
Jospar boıynsha, keme Jer serigin 10 táýlik ishinde aınalyp ótip, keıin Jerge qaıta oralady.
Aıta keteıik, Aıǵa ushyp bara jatqan astronavtar Jerdiń tańǵajaıyp sýretin túsirip alǵanyn jazdyq.
Al keshe astronavttar Jerden eń alys ushý rekordyn jańartýǵa jaqyn qalǵany habarlandy.
