«Artemıda-2» mıssııasymen Aıǵa ketken astronavtar Jerge oraldy
ASTANA. KAZINFORM – NASA-nyń «Artemıda-2» mıssııasy aıasynda Aıdy aınalyp ushqan «Orıon» ǵarysh kemesi Kalıfornııa jaǵalaýy mańyndaǵy Tynyq muhıtyna sátti qondy. Qoný sátiniń tikeleı efırin NASA-nyń YouTube arnasynda úsh mıllıonnan astam adam tamashalady, dep habarlaıdy VVS.
NASA astronavtary Rıd Ýaısmen, Vıktor Glover jáne Krıstına Kýk, sondaı-aq Kanada ǵarysh agenttiginiń astronavty Djeremı Hansen Jerden 407 000 shaqyrym qashyqtyqqa deıin alystady. Adamzat tarıhynda buǵan deıin eshbir adam planetadan mundaı qashyqtyqta bolǵan emes.
1 sáýirde bastalǵan mıssııa barysynda onyń qatysýshylary, sonyń ishinde, avtonomdy rejımde alty kúnge deıin tynys alýdy qamtamasyz ete alatyn jańa skafandrlardy synaqtan ótkizdi.
Basqarý ortalyǵynda ushý úderisi kerneý shegine jetkeni bilindi. Óıtkeni apparat atmosferanyń tyǵyz qabattaryna engen sátte eń joǵary qyzý kezeńinde lapyldaǵan plazmaǵa oranyp, sonyń saldarynan baılanys ýaqytsha úzilip qaldy.
Erekshe nazar ekstremaldy joǵary temperatýraǵa tótep berýi tıis jylý qorǵanys qalqanyna aýdaryldy. 2022 jyly ekıpajsyz ótken aldyńǵy synaq ushýy kezinde onyń betinde Aıdyń bederin eske túsiretin eleýli zaqymdar tirkelgen bolatyn.
Sý betine qoný josparǵa saı sátti ótti. AQSh-tyń batys jaǵalaýynyń jergilikti ýaqyty boıynsha shamamen 17:08-de.
Buǵan deıin «Artemıda-2» mıssııasynyń astronavtary Jerden eń alysqa uzaý rekordyn ornatqany habarlanǵan.
