Artem Sarkısıan: Olımpıada chempıonymen aıqasamyn degen qorqynysh bolmady
NAGOıA. KAZINFORM — Semserlesýden Qazaqstan quramasy Artem Sarkısıan Japonııada ótip jatqan HH jazǵy Azııa oıyndarynda eki júlde jeńip aldy. Sportshy komandalyq jarystan keıin Kazinform tilshisine az-kem suhbat berip, jarys joly jáne qarsylasy týraly pikir bildirdi.
Otandasymyz Azıadanyń eki dúrkin qola júldegeri ekenin eske alyp, bul kásibı mansabyndaǵy mańyzdy jetistik ekenin basa aıtty.
— Bul — keremet sezim. Shyn máninde jarys aıaqtalǵan bette nemese sol kúni sportshy ne bolǵanyn nemese qandaı jetistikke jetkenin birden tolyq sezine bermeıdi. Al bir-eki kún ótken soń ǵana jekpe-jektiń qanshalyqty qıyn bolǵanyn uǵynasyń. Iá, elimiz qorjynyna júlde syılaý, bul — kóńilge qýanysh uıalatatyn sezim, — dedi ol.
Semserlesýshi búgingi báseke týraly óz pikirin bildirdi.
— Biz únemi ádis-tásilderimizdi ózgertip otyrdyq. Qarsylasym taktıkasyn úsh-tórt ret ózgertti, men de solaı istedim. Jalpy, aqtyq syn ońaıǵa soqqan joq, nátıjesinde qola medaldi qanaǵat tuttyq, — dedi Artem.
Qazaqstandyq sportshy jekeleı syndaǵy qarsylasy — úsh dúrkin Olımpıada chempıony jáne bes dúrkin álem chempıony O San Ýk týraly da aıtty.
— Jartylaı fınalda Ońtústik Koreıalyq Olımpıada chempıonymen kezdesetinimdi bilgende eshqandaı qobaljý sezimi bolmady. Biz kez kelgen qarsylasqa árqashan birdeı daıyndalamyz. Onyń Olımpıada chempıony ekeni nemese emes ekeni mańyzdy emes. Jaı ǵana bapkerdiń jospary jáne taktıkasyna mán berdim. Alaıda jekpe-jek ońaı bolǵan joq. Men qortyndysynda qola júldeger atandym, — dedi ol.
Eske salaıyq, Artem Sarkısıan semserlesýden jekeleı synda qola medal qanjyǵalady.
Osyǵan deıin habarlaǵanymyzdaı, semserlesýden Qazaqstan erler quramasy Azııa oıyndarynda sablıa baǵdarlamasy boıynsha qola júlde enshiledi.
