«Artem» men «Big Shanhaıda» sanıtarlyq talaptar saqtalmaǵan - monıtorıng toby
NUR-SULTAN. QazAqparat - «Artem» jáne «Big Shanhaı» bazarlarynda sanıtarlyq-epıdemıologııalyq normalar buzylǵan, dep habarlaıdy QazAqparat elorda ákimdiginiń resmı saıtyna silteme jasap.
Saıttaǵy málimetterge qaraǵanda, Nur-Sultanda karantın sharalary birtindep alynǵannan keıin, iri saýda jáne oıyn-saýyq ortalyqtary, fıtnes-ortalyqtar, sulýlyq salondary jáne basqa da shaǵyn jáne orta bıznes nysandary qyzmetin qaıta bastady.
Apta ishinde ákimdik, taýarlar men qyzmetterdiń sapasy men qaýipsizdigin baqylaý departamenti ókilderinen quralǵan elordalyq monıtorıng toby kásipkerlerdiń sanıtarlyq-epıdemıologııalyq talaptardy saqtaýy boıynsha reıdter ótkizdi.
Senbi kúni polıtsııa qyzmetkerlerinen jáne Baıqońyr aýdanynyń taýarlar men qyzmetterdiń sapasy men qaýipsizdigin baqylaý basqarmasy ókilderinen turatyn mobıldi top bazarlarda sanıtarlyq-epıdemıologııalyq talaptardyń saqtalýyn qadaǵalady.
Monıtorıng barysynda «Artem» jáne «Big Shanhaı» bazarlarynda áleýmettik qashyqtyq pen maska taǵý tártibin buzý jaǵdaılary anyqtaldy. Sondaı-aq barlyq bólimder men býtıkterde sanıtaızerler men termometrııa ornatylmaǵan. Keıbir býtıkterde áleýmettik qashyqtyq saqtaýǵa múmkindik jasalmaǵan.
Anyqtalǵan ereje buzýshylyqtar úshin Qazaqstan Respýblıkasynyń halyqtyń sanıtarlyq-epıdemıologııalyq salaýattylyǵy salasyndaǵy zańnamanyń 425 babynyń 1-tarmaǵy boıynsha ákimshilik jaza qoldanylady.
Jalpy alǵanda, 5 shildeden bastap QR ÁQBtK 425-baby boıynsha 863 ereje buzý jaǵdaılary anyqtaldy. Onyń 236-syn jeke tulǵalar, 627-in kásipkerlik sýbektileri jasaǵan. Barlyq jınalǵan materıaldar boıynsha Nur-Sultan qalasynyń taýarlar men qyzmetterdiń sapasy men qaýipsizdigin baqylaý departamenti tıisti sheshim shyǵarady.
Qoǵamdyq oryndarda adamdar qashyqtyq saqtap, maska taǵyp, sanıtaızer qoldanýy kerek.
