Artem Matýsevıch akademııalyq eskek esýden U23 álem chempıonatynyń fınalyna shyqty
ASTANA. KAZINFORM — Bul kúnderi Germanııanyń Dýısbýrg qalasynda akademııalyq eskek esýden 23 jasqa deıingi sportshylar arasyndaǵy álem chempıonaty ótip jatyr, dep habarlaıdy Eskek esý sporty túrlerinen ulttyq federatsııanyń baspasóz qyzmeti.
Jartylaı fınal nátıjesinde Ulttyq qurama sportshysy Artem Matýsevıch jeńil salmaqtaǵy erler arasyndaǵy jekeleı synda joǵary nátıje kórsetip, fınalǵa joldama aldy. Otandasymyz qashyqtyqty 07:07.75 sekýnd ýaqytynda júzip ótip, óte tartysty básekede jalpy esepte 2-orynǵa turaqtady. Artem óz tobynda márege Joao Velosodan (Portýgalııa) keıin jetti.
Keshe Matýsevıch irikteý kezeńinde de 2-oryn alyp, TOP-12 qatarynda tikeleı jartylaı fınalǵa shyqqan.
Aıta keteıik, Artem - byltyr Shanhaıda ótken eresekter arasyndaǵy álem chempıonatynda TOP-10 qatarynan (9-oryn) kóringen atlet.
Kezeń qorytyndysy boıynsha alǵashqy altylyqqa engen eskekshiler fınalda júldege talasady. Al 7-12 oryndardy ıelengender qalǵan oryndar úshin baq synaıdy.
Sondaı-aq jýyrda álem kýbogynda júlde alǵan Varvara Belonogova men Tamara Pervýshkına juby jartylaı fınalda synǵa tústi. Endi olar B fınalynda 7-12 orynǵa talasady. Komandamyzdyń taǵy bir ókili ıAroslav Melnıkov S fınalynda 13-18 oryndar aralyǵyn sarapqa salady. Al ıAroslav Melnıkov pen Tımýr Fomıchev juby S fınalynda jarysty aıaqtady.
Aıta keteıik, chempıonatqa Qazaqstan komandasy sapynda 5 sportshy attandy. Barlyǵy Dýısbýrg qalasyndaǵy jarysqa 49 memleketten 600-den astam eskek esý sheberi qatysyp jatyr.
Eske salaıyq, buǵan deıin sý dobynan Qazaqstannyń U19 erler quramasy Azııa chempıonatynyń kúmis júldegeri atanǵanyn habarlaǵanbyz.
