Arshavın qazaqstandyq blogerdiń shashyn taqyrlap alyp tastaýǵa ýáde etti
ASTANA. QazAqparat - Qazaqstandyq «Qaırat» klýbynyń fýtbolshysy Andreı Arshavın maýsym aıynyń basynda qazaqstandyq bloger jarııalaǵan báske qatysty beınehabarlama joldady.
Bloger Petr Volıkov reseılik forvard Andreı Arshavınniń «Qaırat» fýtbol klýbyna aýysqan sátinde reseılik oıynshynyń Qazaqstan premer-lıgasynda jarytyp oınaı alatynyna kúmán keltirgen bolatyn. Jýrnalıs tipti báske de barǵan bolatyn - eger Arshavın «Qaırat» úshin 8 gol salatyn bolsa, onda Petr shashyn taqyrlap tastaıtyndyǵyn málimdegen.
Keshe, 25 qyrkúıekte «Aqtóbe» komandasyna qarsy ótkizgen oıynda Arshavın chempıonattaǵy 8-golyn saldy. Matchtan soń, fýtbolshy blogerge arnap beınehabarlama joldady.
«Petr, sálemetsiz be! Fýtbol maýsymy bastalǵanda, «eger Arshavın 8 gol salatyn bolsa, shashymdy taqyrlap alyp tastaımyn» dep aıtýǵa dátińiz barǵan bolatyn. Búgin bul oqıǵa oryn aldy, Sizdiń qýanyshyńyzǵa ma, qaıǵyńyzǵa ma, bilmeımin. Sondyqtan ýaqyty men kezdesetin jerińizdi aıtyńyz, men ózim kelip, sol ýádeńizdi oryndaýǵa daıynmyn!», - dedi Andreı Arshavın blogerge arnaǵan beınerolıkte.
