Arshavın Álem birinshiligindegi Reseı quramasynyń múmkindigine boljam jasady
ALMATY. QazAqparat - Qazaqstandyq fýtbolshy Baýyrjan Islamhan men reseılik Andreı Arshavın fýtboldan álem birinshiligi týraly oılaryn ortaǵa saldy.
FIFA ÁCh-2018 tóńiregindegi pikirler Almatyda jedel tamaqtaný qyzmetin kórsetetin qazaqstandyq kompanııa uıymdastyrǵan brıfıngte aıtyldy, dep habarlaıdy QazAqparat tilshisi.
Andreı Arshavın Reseı quramasyn shırek fınalǵa ótken komandalardyń ishindegi álsizi dep sanaıdy. Soǵan qaramastan ol Álem chempıonatynyń kýbogyna Reseı komandasy ıe bolǵanyn qalaıdy.
«Shırek fınalǵa shyqqan komandalar arasynda Reseı quramasynyń jeńisten úmiti az. Komandanyń kelesi matchtaǵy qarsylasy - Horvatııa da óte myqty. Reseıdiń Ispanııamen bolǵan kezdesýi orystar úshin ońaıǵa soqqan joq. Horvatııamen match ta solaı bolýy yqtımal. Degenmen bári múmkin. Ispanııany jeńgen Reseı basqasyn da basyp ozýy ǵajap emes. Sońǵy onjyldyqta Reseıdiń myqty qaqpashysy sanalǵan Igor Akınfeevti aıtpaǵanda, reseılikterdiń fızıkalyq turǵydan daıynyǵy óte jaqsy deýge bolady. Oǵan qosa jankúıerlerdiń erekshe qoldaýy Reseı qurama komandasynyń jaqsy oıyn kórsetýine yqpalyn tıgizýde. Buǵan dálel - komandanyń búginge deıingi kórsetken nátıjesi»,- dedi Arshavın jýrnalısterdiń saýalyna.
Fýtbolshy buǵan deıingi baspasóz betterindegi suhbatynda Álem chempıonatynyń kelbeti - Brazılııa men Frantsııa quramasy degen bolatyn.
«Eger aqtyq kezeńde Brazılııa men Frantsııa kezdesetin bolsa, Brazılııa quramasynyń kúshi basym túsedi dep oılaımyn. Alaıda men Reseı quramasyna jaqtasamyn»,-dedi Arshavın.
Al, qazaqstandyq fýtbolshy Baýyrjan Islamhan jaqsy oıynǵa jankúıer bolatynyn jetkizdi.
«Men fýtboldan álem birinshiliginde Argentına men Ispanııanyń oıynyna qoldaý bildirdim. Ispanııa quramasynyń oıynshysy Inestany unatamyn. Biraq ózderińiz biletindeı, olar oıynnan shyǵyp qaldy. Buǵan bola kóńilimdi túsirgen joqpyn, men árqashan jaqsy oıynnyń jankúıerimin»,-dedi Baýyrjan Islamhan.
Jýrnalıster «Qaırat» fýtbol komandasynyń jartylaı qorǵaýshysynan Qazaqstan quramasynyń álemdik dop dodasyna qashan qatysatynyn suraýdy umytqan joq.
«Qyrkúıek aıynda ótetin ÝEFA Ulttar lıgasynda jaqsy oıyn kórsetsek, álem birinshiligine qatysýǵa múmkindik alamyz degen oıdamyz»,-dedi Baýyrjan Islamhan.
Fýtboldan kelesi Álem chempıonaty 2022 jyly Katarda ótedi.
