Arshaly aýdanynda ÚIID baǵdarlamasy boıynsha 8 joba júzege asyrylýda - Aqmola oblysy
KÓKShETAÝ. QazAqparat - Arshaly aýdanynda ÚIID baǵdarlamasy boıynsha 8 joba júzege asyrylýda. Bul týraly óńirlik kommýnıkatsııalar qyzmetinde aýdan ákimi Azamat Taıjanovtyń qatysýymen ótken brıfıngte aıtyldy, dep habarlaıdy QazAqparat tilshisi.
Ákimniń aıtýynsha, arshalylyqtardyń ál-aýqatyn arttyrý baǵytynda júzege asyrylyp jatqan memlekettik baǵdarlamar men áleýmettik-ekonomıkalyq damý kórsetkishteri aýyz toltyryp aıtarlyqtaı. Aýdan ekonomıkasyna aýyl sharýashylyǵy, ónerkásip, qurylys sııaqty salalardyń qosar úlesi zor.
«Aǵymdaǵy jyldyń 10 aıynda aýyl sharýashylyǵy salasynda 15 mıllıard teńgeden astam ónimniń óndirilýi kóp nárseni ańǵartady. Aýdanda jyl ótken saıyn mal basy men qus sany artyp keledi. Jyl basynan beri aýdan boıynsha barlyǵy 3 aýyl sharýashylyǵy kooperatıvi quryldy. Osynyń arqasynda aýdan boıynsha jyl basynan beri barlyǵy 3,2 myń tonna et jáne 16 myń tonnadan astam sút óndirildi. Oǵan qosa, aýdanda «Aýyl sharýashylyǵyn qarjylaı qoldaý qory» aktsıonerlik qoǵamynyń kómegimen «Bereke», «Igilik» jáne «Birlik» baǵdarlamalary boıynsha 5 joba júzege asyrylýda», - dedi aýdan ákimi óz sózinde.
Ásirese, bıylǵy jyl aýdan dıqandary úshin tabysty boldy. Agrotehnıkalalyq sharalar men ozyq tehnologııany tıimdi qoldanǵan aýdan dıqandary qońyr kúzde barlyǵy 143,6 myń tonna astyq jınap aldy. Bul sońǵy jyldary qol jetkizilip otyrǵan joǵary kórsetkish. Mundaǵy gektar túsimi ortasha 8,5 tsentnerden aınaldy. Oǵan qosa, aýdanda ónerkásip salasy birshama jaqsy damýda.
«Ónerkásip salasynda shaǵyn bıznes ókilderiniń alatyn úles salmaǵy qomaqty bolyp otyr. Osy arada aıta keterlik bir jaıt, «Jumyspen qamtýdyń jol kartasy - 2020» baǵdarlamasy sheńberinde jeńildetilgen sharttarmen nesıe alyp, óz kásibin ashqysy keletinderge barlyq múmkindik bar. Máselen, bir ǵana «údemeli ındýstrııaldy ınnovatsııalyq damý» baǵdarlamasy boıynsha «LR-KZ», «DS-Granıt», «Eńbek-1», «Arshaly kirpish zaýyty», Qazshpal», «Djamılııa», «QazArt» jáne «Komservıs» JShS 8 joba júzege asyrylýda», - dedi aýdan ákimi.
Qazirgi tańda baspana máselesi qalada da, aýylda da ótkir bolyp otyrǵany belgili. Osy oraıda, aýdanda úı qurylysy salasyn damytýǵa jetkilikti kóńil bólinip keledi. Bıylǵy jyldyń qańtar-qazan aılarynyń aralyǵynda 5 mıllıonǵa jýyq teńgeniń qurylys jumystary atqarylǵan. Jyl basynan beri jalpy aýqymy 2,7 myń sharshy metr turǵyn úı salynyp, paıdalanýǵa berildi.
Sonymen qatar, aýdanda densaýlyq saqtaý, bilim jáne mádenıet nysandaryn salý, ustaý jumystaryna da jetkilikti dárejede kóńil bólinip keledi.
