Arshaly aýdanynda sý tasqynyna qarsy jumys júrgizilip jatyr
KÓKShETAÝ. QazAqparat - Aqmola oblysynyń Arshaly aýdanynda Jibek joly kentiniń aınalasyna topyraqtan turǵyzylǵan eki shaqyrymdyq bógetti nyǵaıtý jalǵasýda, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimetinshe, bul jumystarǵa azamattyq qorǵanys polkiniń 52859 áskerı bólimi men Aqmola oblysy TJD jeke quramy, jergilikti atqarýshy organdardan 12 adam jáne 3 eskavator jumyldyrylǵan. Sondaı-aq, bes turǵyn úıdiń aýla aýmaǵynda tórt motopompamen sý sorǵyzý júrgizilip jatyr.
«Qazirgi ýaqytta jaǵdaı tolyǵymen baqylaýda. Aǵyn sý shtattyq rejımde aǵyzylýda. Eldi mekenderdi sý basý qaýpi joq. Qutqarýshylar men jergilikti atqarýshy organdar ótken táýlikte Arshaly aýdanynda 700 tekshe metr sý sordy, 6 550 qap ınertti materıalǵa toltyrylyp, qum salynǵan 3 200 qap tóseldi», - dedi vedomstvodan.
Eske sala ketsek, keshe Arshaly aýdanyna sý tasqynymen kúresý úshin Aqmola oblysy TJD qosymsha kúshteri men quraldary, sondaı-aq, Qaraǵandy oblysynyń áskerı bólim qyzmetkerleri jiberildi.
