Arshaly aýdanynda elordanyń azyq-túlik beldeýin damytý boıynsha 4 joba júzege asyrylýda

KÓKShETAÝ. QazAqparat - Arshaly aýdanynda Nur-Sultan qalasynyń aınalasyndaǵy azyq-túlik beldeýin damytý sheńberinde 2021 jylǵa 21,1 mıllıard teńge somasyna 4 ınvestıtsııalyq jobany júzege asyrý josparlanyp otyr. Bul týraly óńirlik kommýnıkatsııalar qyzmetinde ótken brıfıngide aýdan ákimi Aıdar Baımanov málim etti, dep habarlaıdy QazAqparat.

Aýdan ákiminiń aıtýynsha, jyl basynan beri aýyl sharýashylyǵynyń ósimi 1,3 paıyzǵa artty, óndirilgen ónim kólemi 4 mıllıardtan astam teńgeni qurady.

«Aýyl sharýashylyǵynda jalpy óniminiń naqty kólem ındeksi 75,3 paıyzdy qurady. Egistik jumystaryn tolyq keshendi júrgizýde aýyl sharýashylyq tehnıkamen jabdyqtalýy mańyzdy oryn alady. Aǵymdaǵy jyly aýdannyń aýyl sharýashylyq qurylymdary jalpy somasy 1,1 mıllıard teńgege 36 birlik aýyl sharýashylyq tehnıkasyn satyp aldy», - dedi Aıdar Baımanov.

Ákim atap ótkendeı, aýdanda sýarmaly jerlerdiń aýdanyn keńeıtý boıynsha jumystar júrgizilýde.

«Bıylǵy jyly aýdanda sýarmaly jerlerdiń kólemi 28 paıyzǵa, ıaǵnı 243 gektarǵa ulǵaıtyldy», - dep tolyqtyrdy aýdan ákimi.

Sonymen birge, munda etti mal sharýashylyǵyn damytýǵa erekshe nazar aýdarylady. Ótken jyly jalpy sany 404 bas etti tuqym baǵytyndaǵy 3 ferma jáne 2 taýarly sút ferma quryldy. Aǵymdaǵy jyly mal sharýashylyǵyn damytý boıynsha ındıkatıvtik kórsetkishterdi oryndaý aıasynda 40 bas gereford sıyrlary jáne 33 bas sımmetal sıyrlary satyp alyndy.

«Astananyń aınalasyndaǵy azyq-túlik beldeýin damytý sheńberinde 2021 jylǵa 21,1 mıllıard teńge somasyna 4 ınvestıtsııalyq jobany iske asyrý josparlanyp otyr. Osy jobalar aıasynda jylyna 6 myń tonna qus etin óndiretin qus fabrıkasyn qoldanysqa berýdiń 2-shi kezegin júzege asyrý, 100 bas iri qara malǵa arnalǵan bordaqylaý alańyn ashý josparlanǵan. Sondaı-aq, sút salasyn odan ári jedel damytý maqsatynda 150 basqa arnalǵan sút fermasy salynady. Atalǵan jobalardy iske asyrý 130 jańa jumys ornyn qurýǵa múmkindik beredi», - dep túıindedi aýdan ákimi.