Arshaly aýdanynda jalpy aýdany 300 gektar bolatyn ındýstrııalyq aımaq qurylady
ASTANA. KAZINFORM – Arshaly aýdanynda jalpy aýdany 300 gektar bolatyn ındýstrııalyq aımaq qurylady. Bul týraly Úkimet otyrysynda Astana aglomeratsııasyn damytýdyń 2024-2028 jyldarǵa arnalǵan keshendi josparynyń jobasyn tanystyrǵan Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.
«Azyq-túlik beldeýin damytý jáne ınvestıtsııalardy tartý úshin 25 azyq-túlik óndirý nysany, 12 ónerkásiptik taýarlar óndirý kásiporny salynady. Arshaly aýdanynda jalpy aýdany 300 gektar ındýstrııalyq aımaq qurylady. Keshendi josparda qaýipsizdikti qamtamasyz etý jáne tótenshe jaǵdaılardyń aldyn alý jónindegi de is-sharalar kózdelgen. 2028 jyldyń sońyna deıin 7 órt sóndirý deposy salynady jáne halyqty habardar etý júıesi qurylady», — dedi mınıstr.
Nurlan Baıbazarovtyń aıtýynsha, aglomeratsııanyń ekologııalyq jaǵdaıyn jaqsartý úshin qýattylyǵy jylyna 40 myń tonna bolatyn 5 qatty turmystyq qaldyqtardy suryptaýǵa arnalǵan jabdyqtardy satyp alý, Jibek joly aýylyndaǵy Esil ózenin keńeıtý jáne túbin tereńdetý, Bozaıǵyr aýylynda ormandy qalpyna keltirý úshin kóshetter otyrǵyzý josparlanǵan.
«Keshendi jospardy iske asyrý qorytyndysynda 2029 jylǵa qaraı 3 myńnan astam turaqty jáne ýaqytsha jumys ornyn qurý, 70 myńnan astam adamdy medıtsınalyq qyzmet kórsetýmen qamtamasyz etý, óńdeý ónerkásibinde ónim shyǵarý kólemin 120 paıyzǵa deıin ulǵaıtý, jaqsy jáne qanaǵattanarlyq jaǵdaıdaǵy joldardyń úlesin 55 paıyzdan 70 paıyzǵa deıin arttyrý josparlanǵan», — dedi ol.
