Arshaly aýdanynda 200-den astam adam ekologııalyq aktsııaǵa qatysty
ARShALY. KAZINFORM — Búgin Arshaly aýdanyndaǵy kórikti Esil ózeniniń jaǵalaýy sýdyń syldyrymen ǵana emes, týǵan jerdiń tazalyǵyna beıjaı qaramaıtyn azamattardyń jarqyn únderimen de erekshe jandandy. «Taza Qazaqstan» respýblıkalyq baǵdarlamasy aıasynda munda óńirimizdi taza ári jasyl etýge baǵyttalǵan «Taza el — jarqyn bolashaq» atty aýqymdy ekologııalyq aktsııa ótti.
Tańerteńnen bastap ózen jaǵasyna 200-den astam adam jınaldy. Olardyń qatarynda jergilikti atqarýshy organdardyń ókilderi, aýdandyq máslıhat depýtattary, mektep muǵalimderi men oqýshylary, belsendi eriktiler jáne týǵan ólkeniń tabıǵatyna janashyr aýdan turǵyndary boldy. Barlyǵynyń maqsaty bir — aýmaqtyń ekologııalyq jaǵdaıyn jaqsartý, qorshaǵan ortaǵa uqypty qaraý mádenıetin qalyptastyrý jáne ortaq iske óz úlesterin qosý.
Memleket basshysynyń tapsyrmalaryn oryndaý maqsatynda uıymdastyrylǵan bul shara birlesken eńbektiń naqty nátıjege jetkizetininiń jarqyn úlgisine aınaldy. Aktsııaǵa qatysýshylar úlken yntamen jumysqa kirisip, Esil ózeniniń jaǵalaý syzyǵy men oǵan irgeles qoǵamdyq aýmaqtardy turmystyq qaldyqtardan tazartty. Nátıjesinde aýmaq aıtarlyqtaı kórkeıip, taza ári tartymdy keıipke endi.
— Qurmetti jerlester, qadirli qonaqtar! Búgin biz munda tek qoqys jınaý úshin ǵana jınalǵan joqpyz. Biz aýdanymyzdyń, elimizdiń bolashaǵyna beıjaı qaramaıtynymyzdy kórsetý úshin keldik. «Taza el — jarqyn bolashaq» aktsııasy — bir rettik shara ǵana emes, ol árqaısymyzdy keler urpaqqa qandaı álem qaldyratynymyz týraly oılanýǵa shaqyrady. Búgin ýaqytyn da, kúshin de týǵan jerdiń tazalyǵy úshin aıamaı kelgen barsha azamattarǵa shynaıy alǵysymdy bildiremin. Sizderdiń belsendi azamattyq ustanymdaryńyz — óńirimizdiń órkendeýiniń negizi. Tazalyq árqaısymyzdan, qorshaǵan ortaǵa degen jeke kózqarasymyzdan bastalatynyn umytpaıyq, — dep atap ótti Arshaly aýdanynyń ákimi Dostanbek Esjanov.
Aktsııaǵa qatysýshylar qorshaǵan ortany qorǵaý — memleket pen qoǵamnyń ortaq mindeti ekenin erekshe atap ótti. Olardyń pikirinshe, ár azamattyń ekologııalyq jaýapkershiligi turaqty damýdy qamtamasyz etýde jáne halyqtyń ómir súrý sapasyn arttyrýda mańyzdy ról atqarady.
— Men bul jerge balalarymmen birge keldim, sebebi olardyń tabıǵatty qorǵaýdyń mańyzyn jastaıynan túsingenin qalaımyn. Bul olarǵa tazalyqtyń tek kommýnaldyq qyzmetterdiń ǵana emes, barshamyzdyń ortaq jaýapkershiligimiz ekenin óz úlgimizben kórsetýdiń tamasha múmkindigi, -dedi aýdan turǵyndarynyń biri.
Aktsııa shynaıy aýyzbirshilik pen ózara qoldaý jaǵdaıynda ótti. Qatysýshylar bir-birine kómektesip, uıymshyldyqpen eńbek etti. Olardyń júzinen atqarylǵan iske degen maqtanysh sezimi baıqaldy. Іs-shara týraly aqparat aýdan ákimdiginiń resmı ınternet-resýrstarynda jáne áleýmettik jelilerde jedel jarııalanyp, kópshiliktiń nazaryn aýdardy.
Arshaly aýdanynyń ákimi atap ótkendeı, «Taza Qazaqstan» baǵdarlamasy aıasyndaǵy jumystar júıeli túrde jalǵasady. Aldaǵy ýaqytta ekologııalyq jáne tabıǵatty qorǵaý is-sharalaryna turǵyndardy keńinen tartý josparlanýda. Sebebi barshamyzdyń ortaq kúsh-jigerimiz arqyly ǵana shyn máninde «Taza Qazaqstandy» qalyptastyryp, jarqyn bolashaqqa qol jetkize alamyz.
