«Arsenaldyń» bas bapkeri «Qaıratty» tájirıbeli qarsylas dep baǵalady

ASTANA.KAZINFORM - Anglııanyń «Arsenal» (London) komandasynyń bas bapkeri Mıkel Arteta UEFA Chempıondar lıgasy negizgi kezeńi segizinshi týryndaǵy qazaqstandyq «Qaırat» (Almaty) kezdesýi aldynda jýrnalıster saýalyna jaýap berdi.

Mıkel Arteta baspasóz máslıhatynda «Qaıratqa» qatysty jan-jaqty zertteý júrgizgenine, qarsylastyń myqty jáne álsiz tusyna toqtalyp, londondyq klýbty aldaǵy kezdesýde qıyn synaq kútip turǵanyna toqtaldy.

— Bul — Chempıondar lıgasy, sondyqtan munda árbir qarsylas mańyzdy bolady. Barlyǵy jeńiske jetýge kúsh salady. Sondaı-aq, «Qaırattyń» ishki chempıonattaǵy jaǵdaıyna baılanysty erekshe jaǵdaılar bar. Men olardyń «Real Madrıd» jáne «Intermen» ótken eki kezdesýin qarap shyqtym. Olar atalǵan komandalarǵa óte úlken problema týǵyzdy. Sol sebepti biz erteńgi kezdesýde olardan sondaı qarsylyqty kútemiz. Biz eń joǵary deńgeıde bolýymyz kerek. Óıtkeni biz bul matchta taǵy da jeńiske jetkimiz keledi jáne biz bul úshin kúresetin bolamyz, — dedi Arteta Kazinform agenttiginiń suraǵyna jaýap bere otyryp.

Bapkerdiń aıtýynsha, komanda qatysatyn barlyq týrnırdegi ózderiniń myqty pozıtsııasyn túsinedi jáne barlyq kúsh-jigerin jeńis úshin kúresýge baǵyttap, maýsymnyń sheshýshi kezeńin ótkizýge nıet tanytyp otyr.

— Biz birden tórt týrnırde tamasha pozıtsııada bolý quqyǵyna ıe boldyq. Aldaǵy tórt aıda biz úlken qulshynys, erekshe batyldyq jáne jeńiske degen jiger arqyly senimmen oınaımyz. Bizdiń negizgi kózqarasymyz osyǵan saıady. Barlyq energııany soǵan baǵyttaımyz, — dedi londondyq klýbtyń bas bapkeri.

Baspasóz máslıhatynda Arteta komandanyń tyǵyz kúntizbesine qatysty taqyrypty qozǵady.

«Arsenal» sońǵy tórt matchty tórt túrli týrnırde ótkizdi, bul — komanda úshin úlken synaq.

Dúısenbide bapkerler quramy jáne oıynshylar birge árbir jaǵdaıǵa qatysty egjeı-tegjeıli taldaý júrgizdi.

Kezdesý 28 qańtardan 29-na qaraǵan túni saǵat 1:00–de Anglııa astanasy London qalasyndaǵy «Emıreıts» stadıonynda bastalyp, «Qazaqstan» telearnasynan tikeleı efırde kórsetiledi.

Bul mindetti shveıtsarııalyq kelgen Ýrs Shnıder bastaǵan tóreshiler brıgadasy atqaratyn bolady. Oǵan otandastary Marko Tsıýrher men Benıamın Tsıýrher kómektesedi.

Tórtinshi tóreshi de sol eldiń ókili Sven Volfensberger.

Osyǵan deıin negizgi kezeńde «Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesiine» 1:4 esebimen jol berse, Kıprdiń «Pafosymen» 0:0 esebimen teń tústi.

Aǵylshyndyq komanda jarys barysynda Ispanııanyń «Atletık Bılbao» (2:0), Grekııanyń «Olımpıakos» (2:0), Ispanııanyń «Atletıko Madrıd» (4:0), Chehııanyń «Slavııa» (3:0), Germanııanyń «Bavarııa» (3:1), Belgııanyń «Brıýgge» (3:0), Italııanyń «Inter» (3:1) klýbtarynan basym tústi.