«Arsenal» - «Qaırat» matchynyń aınalasyndaǵy atmosfera qandaı
ASTANA. KAZINFORM - «Qaırat» UEFA Chempıondar lıgasy negizgi kezeńiniń segizinshi týryndaǵy Anglııanyń «Arsenalymen» kezdesýge daıyndalyp jatyr.
Tóreshiniń alǵashqy ysqyryǵy London ýaqyty boıynsha saǵat 20:00-de estiledi. Soǵan qaramastan 60 myńdyq «Emıreıts» stadıony aýmaǵynda oıynǵa deıin qarbalas jandana bastady. Kezdesý bastalǵanǵa deıin eki-úsh saǵat qalǵanda Londonnyń soltústigindegi kósheler qyzyl jáne aq sharf taqqan adamdarǵa tolyp jatqany ańǵarylady. Ádette, «Arsenal» jankúıerleri dástúrli túrde pabtarǵa jınalady. Olardyń kópshiligi arnaıy rejımde jumys isteıdi. Onda tek match bıletine jáne londondyq komandany qoldaıtyndarǵa ǵana ruqsat etiledi. Bul oryndarda londondyq fýtbol keshterine tanys atmosfera qalyptasady. Jankúıerler bastapqy quramdy talqylaıdy. Komandanyń Aǵylshyn Premer-lıgasy, Anglııa Kýbogy, Lıga Kýbogy jáne Chempıondar Lıgasyndaǵy bolashaǵy týraly qyzý pikirtalas bolady.
Olardyń arasynda Qazaqstannan kelgen qonaqtar erekshe baıqalady. «Qaırat» jankúıerleri shaǵyn toptar boıynsha kózge túsedi. Olar klýbtyq atrıbýt, jalaý, jaı sharfpen júrgeni ańǵarylady. Negizinde London halyqaralyq matchtarǵa úırenip qalǵan. Biraq osy keshte qazaqstandyq komandaǵa tán sary-qara tús pen elimizdiń aspan tústes týy erekshe nazar aýdarady.
Almatylyq komanda jankúıerleri úshin 2 myńǵa jýyq bılet bólingen. Ol satýǵa shyǵarylǵannan keıin kóp uzamaı tolyqtaı ıesin taýyp úlgerdi. Bılet ıeleriniń arasynda Almatydan jáne Qazaqstannyń ózge qalalarynan arnaıy kelgender, Ulybrıtanııada turatyn qazaqstandyqtar bar.
Stadıonnyń kireberis bóligi oıyn bastalardan 2 saǵat buryn ashylady, bul ýaqytta aýmaqtaǵy kólik júıesi joǵary qarqyndy deńgeıde jumys isteıdi. Metro stansasy, avtobýstar men qala mańyndaǵy poıyzdar adamdarǵa toly ekeni baıqalady. Al avtokólikpen kelgender ony stadıonnan tys jerde qaldyrýǵa jáne odan keıin jaıaý kelýge májbúr. Bul - Londondaǵy osyndaı deńgeıdegi matchtar úshin tanys sýret. Adamdar aǵyny bir mınýtqa tolastamaıdy.
Qaýipsizdik máselesine basa nazar aýdarylǵan. Baqylaý trıbýnaǵa kirerge deıin bastalady. Zattardy alyp júrýdiń qatań erejeleri bar. Atap aıtqanda, ólshemi A4 formatynan úlken sómkeler, beınekamera, shyny bótelkeler, parfıýmerııa, qolshatyr jáne ózge de birqatar zatty stadıonǵa alyp kirýge tyıym salynady.
Bul týraly aldyn-ala bilmegender úshin saqtaý kameralary uıymdastyrylǵan. Biraq olar «Kıngs kross» stantsııasynda, «Emıreıtsten» birneshe shaqyrym jerde ornalasqan. Sondyqtan keıbir jankúıerler keshki Londonda qosymsha serýendeıdi.
Oıynnyń bastalýy neǵurlym jaqyndaǵannan saıyn stadıon aınalasyndaǵy atmosfera qyza túsedi. Bul aýmaqta ánder shyrqalyp, komandasyn qoldaǵan jankúıerler kóbeıedi. Kóshedegi sharftar men baǵdarlama ustaǵan satýshylar London keshinde erekshe fýtbol atmosferasyn jasaıdy. Nátıjege qaramastan almatylyq klýb qoldaýsyz qalmaıtyny anyq.
Kezdesý 28 qańtardan 29-na qaraǵan túni saǵat 1:00-de Anglııa astanasy London qalasyndaǵy «Emıreıts» stadıonynda bastalyp, «Qazaqstan» telearnasynan tikeleı efırde kórsetiledi.
Aıta ketsek, 60 myńnan astam jankúıerge arnalǵan «Emıreıts» stadıonynyń paıdalanýǵa berilgenine bıyl jıyrma jyl tolady.
