«Arsenal» – «Qaırat» kezdesýin Londonda qazaqstandyq qansha jankúıer tamashalaıdy

ASTANA. KAZINFORM – UEFA Chempıondar lıgasy negizgi kezeńiniń segizinshi týryndaǵy «Arsenal» (Anglııa) - «Qaırat» (Qazaqstan) kezdesýin Londondaǵy «Emıreıts» stadıonynda qazaqstandyq qansha jankúıer tamashalaıtyny belgili boldy.

Kezdesý 28 qańtardan 29-yna qaraǵan túni saǵat 1:00-de bastalyp, «Qazaqstan» telearnasynan tikeleı efırde kórsetiledi.

«Qaırattyń» jankúıerler sektoryna eki myń bılet bólingen. Satýǵa shyqqannan keıin bir saǵattaı ýaqyt ótkende ol túgeldeı ótip ketken.

Aıta ketsek, 60 myńnan astam jankúıerge arnalǵan «Emıreıts» stadıonynyń paıdalanýǵa berilgenine bıyl jıyrma jyl tolady. Onda «Arsenal» óz alańyndaǵy oıyndaryn ótkizedi. 
Jaraqatyna baılanysty qorǵaýshylar Ýılıam Salıba men ıÝrrıen Tımberdiń aldaǵy kezdesýge qatysýdan tys qalyp otyr. Olardyń ornyn qosalqy quramnan jas fýtbolshylar basýy yqtımal.

Kezdesý barysynda shveıtsarııalyq Ýrs Shnıder bas tóreshi mindetin atqarady. Oǵan otandastary Marko Tsıýrher men Benıamın Tsıýrher kómektesedi. Tórtinshi tóreshi de sol eldiń ókili Sven Volfensberger.

Sondaı-aq búgin jankúıerler Mıkel Merıno men Deklan Raıstyń oıynyn tamashalaı almaıdy. Olar negizgi kezeńdegi jeti kezdesýde úsh márte sary qaǵaz alyp úlgergen edi. 

Al «Qaırat» sapynan Dastan Sátpaev pen Azamat Tuıaqbaev jaraqatyna baılanysty komandamen Londonǵa kelgen joq.

Osyǵan deıin negizgi kezeńde «Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesiine» 1:4 esebimen jol berse, Kıprdiń «Pafosymen» 0:0 esebimen teń tústi.