Arsen Tomskıı Qazaqstanǵa tsıfrlyq táýelsizdik jaıyn oılanýǵa keńes berdi
ASTANA. KAZINFORM — ІT kompanııanyń monopolııanyń joǵary deńgeıine jetýi otarlaýdyń jańa túrine aınalýy múmkin
Bul týraly Taldau Talks podkastynda inDrive halyqaralyq servısiniń negizin qalaýshy ári bas dırektory Arsen Tomskıı aıtty.
— 2023 jylǵa deıin AQSh-ta 4 jyl turdym. Al Qazaqstanda tsıfrlandyrý jaǵynan barlyǵy áldeqaıda jaqsy. Máselen, ol jaqta qandaı da bir qujat alý úshin kúni boıy júrýińe, kútýińe týra keledi. Al bul jerde bári qarapaıym, óte keremet. Tsıfrlandyrý deńgeıin 10-nan 9,5 ball dep baǵalar edim, — dedi ol.
Osy oraıda ol Qazaqstanǵa tsıfrlyq táýelsizdik jaıynda oılanýǵa keńes berdi.
— Óıtkeni kóptegen sheteldik ІT-kompanııa qarqyndy jumys isteı bastaıdy. Al ІT — bir kompanııa búkil halyq óziniń servısin paıdalanatyndaı deńgeıge jetýge qaýqarly sala. Olar sol arqyly adamdardyń sanasyna kúshti áser ete alady. Nemese olar monopolııanyń joǵary deńgeıine jetken kezde tym joǵary soma qoıýy múmkin. Bul otarlaýdyń jańa túrine aınalý yqtımal. Óıtkeni, kompanııa qandaı da bir salada monopolııaǵa aınalǵan kezde óte joǵary komıssııa ala bastaıdy, keıde ol somanyń 57 paıyzyna deıin jetedi. Máselen, Uber qaýyrt mezgilde baǵany áldeqaıda joǵary qoıady da sol somanyń 90 paıyzǵa jýyǵyn ózine qaldyrady. Bul soma ulttyq ekonomıkadan syrtqa ketip jatyr. Bul óte qaýipti. Sondyqtan asyra silteý bolmaýy úshin lımıt belgileý qajet. Munan bólek, óz kompanııalaryńa belsendi qoldaý kórsetken jón, — dedi Arsen Tomskıı.
Osy podkastqa qatysqan Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Qazaqstan tranzaktsııalardyń 90 paıyzy qolma-qol aqshasyz júrgiziletin CASHLESS-ekonomıka retinde moıyndalǵanyn aıtqan edi.
Aıta keteıik, Taldau Talks — Senat tóraǵasy Máýlen Áshimbaev júrgizetin ashyq dıalog alańy. Onda el damýyna qatysty mańyzdy máseleler jáne Memleket basshysy júktegen mindetterdi iske asyrý joldary talqylanady. Bul jolǵy shyǵarylym Qazaqstanda tsıfrlandyrý jáne jasandy ıntelektini damytý taqyrybyna arnaldy.