ArselorMıttaldy Qazaqstan jazaǵa tarta ala ma – Ádilet vıtse-mınıstriniń jaýaby
Ádilet vıtse-mınıstri Alma Muqanova Qaraǵandy shahtasyndaǵy apat úshin ınvestordy jaýapkershilikke tartý múmkindigine qatysty suraqqa jaýap berdi, dep habarlaıdy Kazinform.
«Osy fakti boıynsha ónerkásiptik ári tehnıkalyq qaýipsizdik erejeleriniń saqtalýyna jaýapty adamdar, sondaı-aq tergeý organdary tıisti tekserý jasap jatqany belgili. Osy tragedııa boıynsha áreketterde quqyq buzý belgileri anyqtalsa, onda tergeý nátıjesine qaraı jaýapkershilik qarastyrylady. Árıne, jaýapkershilik bar, biraq onyń qandaı sıpatta bolatyny tergeý amaldarynan keıin aıqyndalady», – dedi A. Muqanova Parlament Májilisinde tilshiler suraǵyna jaýap bere otyryp.
Tilshiler vıtse-mınıstrden: «Sheteldik azamatty (ınvestordy) qylmystyq jaýapkershilikke tartyp, túrmege jabý tehnıkalyq turǵydan múmkin be?», – dep surady.
«Jalpy, Qylmystyq kodekste qylmysty Qazaqstan Respýblıkasynyń azamaty nemese shetel azamaty jasady dep bólmeıdi. Máselen, Qazaqstan aýmaǵynda sheteldik azamat basqa adamnyń ómiri men densaýlyǵyna zııan keltirse, onda ol Qylmystyq kodekstiń baptary boıynsha jaýapkershilikke tartylady», — dep túsindirdi Alma Muqanova.
Eske salaıyq, 28 qazan kúni túngi saǵat 02.33-te Qaraǵandy oblysyndaǵy Kostenko atyndaǵy shahtada órt tutanyp, artynan jarylys boldy. Jer astynda jumys istep jatqan 252 kenshiniń 206-sy óz betimen joǵary shyqty.
Aýrýhanalarǵa 28 adam jetkizildi.
Búgin, 31 qazan kúni 45 kenshiniń denesi jáne qaza tapqan 46-shy adamnyń dene bólshekteri tabylǵany málim etildi.
«ArselorMıttal Temirtaý» AQ-ǵa tıesili 8 shahtanyń jumysy ýaqytsha toqtatyldy.
29 qazan elimizde Jalpyulttyq aza tutý kúni bolyp jarııalandy.
Qaraǵandy óńirine barǵan Memleket basshysy Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.
QR Úkimeti apattan qaza tapqandardyń otbasylaryna qandaı kómek kórsetiletinin jarııalady.
