«ArselorMıttaldaǵy» apatqa birqatar laýazymdy tulǵa kináli
ASTANA. QazAqparat - «ArselorMıttal Temirtaý» AQ jáne kásiporynnyń birqatar laýazymdy tulǵasy óndiris oshaǵynda bolǵan apatqa júz paıyz kináli. Bul týraly QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat.
Vedomstvo málimetinshe, 2018 jyldyń 10 qarashasy kúni saǵat 19-38-de «ArselorMıttal Temirtaý» AQ-da apat saldarynan toptyq jazataıym oqıǵa boldy. Apat saldarynan ottegi tsehynyń aýa bólý ónimderiniń tehnologııalyq qubyrlary buzyldy. Tórt adam zardap shekti. Bolǵan apatty tergep, tekserý jáne jazataıym oqıǵanyń sebepterin anyqtaý úshin Qaraǵandy oblystyq eńbek ınspektsııasynyń 2018 jylǵy 12 qarashadaǵy № 205 buıryǵymen ónerkásiptik qaýipsizdik salasyndaǵy ýákiletti organ ókiliniń tóraǵalyǵymen komıssııa quryldy.
Komıssııa QR Eńbek kodeksiniń 189-babynyń 1-tarmaǵyna jáne 190-babynyń 10-tarmaǵyna sáıkes arnaıy tekserý júrgizdi jáne usynylǵan materıaldar, kýágerler men qatysy bar adamdardan suraq-jaýap negizinde saraptamalyq kishi komıssııanyń qorytyndylarymen tanysyp, tómendegilerdi anyqtady. Atap aıtqanda tehnologııalyq qubyrlardyń buzylýyna mynadaı sebepter boldy:
Birinshi, 2018 jyldyń 6 qarashasynan bastap apatqa deıin joǵary qysymdy ottegi jáne joǵary qysymdy azot qubyr joldaryndaǵy shyǵys pen qysym shamalarynyń úlken deńgeıde aýytqýyna baılanysty qubyr joldaryna edáýir dınamıkalyq salmaq túsken. Sonyń saldarynan 09G2S bolattyń ornyna 20 MS 1050-84 bolattan jasalǵan 126k jáne 127k tireýishteriniń arasynda 2003 jyly ornatylǵan dıametri 720 mm joǵary qysymdy ottegi qubyr joldarynyń tik syzyqty ýchaskesimen 90º buryshy tarmaqtyń dánekerlengen jeri úzildi.
Ekinshi, «Lınde Qazaqstan» JShS bloktarynan aýany bólý ónimderin berýdi der kezinde sóndirmeý bul apattyń taralýyna jáne buzylý kóleminiń úlkeıýine áser etti.
«Komıssııa «ArselorMıttal Temirtaý» AQ jáne kásiporynnyń birqatar laýazymdy tulǵasy oryn alǵan apatqa júz paıyz kináli degen qorytyndyǵa keldi. Jumys nátıjeleri boıynsha komıssııa bolǵan apattyń sebepterin joıý jáne bolashaqta osyndaı jaǵdaılardyń qaıtalanýyn boldyrmaý úshin 15 is-shara ázirledi. Bul is-sharalardyń oryndalýyn baqylaýdy ónerkásiptik qaýipsizdik salasyndaǵy ýákiletti organ júzege asyratyn bolady», - dep atap ótedi mınıstrlikten.
