ArselorMıttal jylyna 200 mlrd teńge tabys taýyp otyrǵan – Májilis depýtaty

 Májilis depýtattary Kostenko shahtasynda qaıǵyly oqıǵa boıynsha arnaıy saýal joldady, dep habarlaıdy Kazinform. 

«Kostenko» shahtasyndaǵy qaıǵyly oqıǵa búkil Qazaqstan halqyn dúr silkindirdi. Biz Qazaqstan Respýblıkasy Parlamenti Májilisiniń atynan árbir otbasyna shyn júrekten qaıǵyryp kóńil aıtamyz. Bul jaǵdaı «Kazahstanskaıa» shahtasyndaǵy apattan 2 aı ótkennen keıin bolyp otyr. Mundaı jazataıym oqıǵalar óz qyzmetkerlerine jaýapsyzdyqpen qaraý saldarynan bolǵany aıqyn. Osyndaı jazataıym oqıǵalardyń barlyǵy kompanııanyń osy jyldar boıy, shyn máninde, qazaqstandyq kenshilerdiń mańdaı ter men adal eńbeginiń arqasynda aqsha tapqanyn kórsetýde», - dedi Májilis depýtaty Arman Qalyqov Májilis otyrysynda.

Onyń aıtýynsha, ArselorMıttal bárine únemdep kelgen.

«Sońǵy tórt jyldaǵy resmı málimet boıynsha, bul kompanııa jylyna 200 mıllıard teńgeden astam tabys taýyp otyrǵan, onyń basym bóligin shetelge shyǵarǵan. Jasalǵan eskertýlerge, ónerkásiptik qaýipsizdikke ınvestıtsııa salý, kómir óndirýdi keńeıtý, barlyq óndiristi jańǵyrtý týraly kelissózder júrgizýge áreket jasalǵanyna qaramastan, kompanııa esh kelisimge kelmegen. Nátıjesinde, osy jyldyń ózinde eki apattyq jaǵdaı boldy, kompanııanyń elde jumys istegen búkil kezeńinde júzdegen qazaqstandyq qaza tapty. Myńdaǵan adam densaýlyǵynan aıyrylyp, múgedek bolyp qaldy», - deıdi ol.

Sondaı-aq halyq qalaýlysy qazir Prezıdent birden-bir durys sheshim qabyldaǵanyn aıtty. Ol – «Arselormıttalmen» yntymaqtastyqtyń toqtalatyny.

«Biz adamdardyń qandaı kúı keship jatqanyn bilip otyrmyz. Ókinishke qaraı, eger sheteldik ınvestor ketse, onda barlyq óndiris toqtaıdy degen 90-jyldary bolǵan qorqynysh bizde áli de bar. Múldem olaı emes. Biz kásiporynnyń jetkilikti aqsha taba alatynyn kórip otyrmyz. Kómir ónerkásibinde 30 jyldyq tájirıbesi bar qyzmetker retinde qaraǵandylyqtardy sabyrlyqqa shaqyrǵym keledi», - deıdi A.Qalyqov.

Onyń aıtýynsha, osy jyldar ishinde tikeleı ınvestor bola alatyn kásipkerler sany jetkilikti dárejede ósti. Osy tragedııadan keıin kásiporyndy óz betinshe damytýǵa kásibı kadrlar jetkilikti.

«Qaraǵandy kómir basseıni men bolat balqytý kombınatynyń strategııalyq obektiler ekenin túsinemiz. On myńdaǵan adamnyń taǵdyry solarmen baılanysty. Qaraǵandy, Temirtaý, Shahtınsk jáne Rýdnyı qalalaryn eshkim tastap ketpeıdi», - dep qorytyndylady depýtat.