«ArselorMıttal Temirtaýdyń» jańa ınvestory Serik Ahmetov degen ras pa – mınıstr jaýap berdi

Úkimet otyrysynan keıingi baspasóz konferentsııada Ónerkásip jáne qurylys mınıstri Qanat Sharlapaev «ArselorMıttal Temirtaýdyń» ornyna keletin ınvestor týraly pikir bildirdi, dep habarlaıdy Kazinform. 

«Úkimet sheteldik ınvestorlardyń kelýin qarastyryp otyrǵan joq. Eńbek sharty, qyzmetshilerdiń sany ózgerissiz qalady», - dedi mınıstr Úkimet otyrysynan keıingi brıfıngte. 

«Ol qazaqstandyq ınvestor Serik Ahmetov (burynǵy Premer-Mınıstr, Qorǵanys mınıstri - red.) bolady degen qanshalyqty ras?» - dep surady jýrnalıst. Qanat Sharlapaev bul suraqqa da qysqa jaýap qaıyrdy. 

«Qazir naqty ınvestor týraly pikir bildire almaımyn. Bul aktıvke sheteldik ınvestor tartýdy josparlap otyrǵan joqpyz. Sony ǵana aıta alamyn», - dedi ol.

BAQ ókiliniń naqtylaý suraǵyna mınıstr: «Ondaı másele talqylanǵan joq», - dep jaýap berdi.