«ArselorMıttal Temirtaýdyń» ornyna kelýge nıetti ınvestorlar Qytaı men Reseıden, Taıaý Shyǵystan habarlasyp jatyr – Raıymbek Batalov
«Atameken» ulttyq kásipkerler palatasynyń tóralqa tóraǵasy Raıymbek Batalov «ArselorMıttal Temirtaý» kompanııasynyń ornyna ınvestor bolýǵa nıetti kompanııalar álemniń qaı elderinen habarlasyp jatqanyn aıtty, dep habarlaıdy Kazinform agenttigi.
Azııadaǵy ózara is-qımyl jáne senim sharalary keńesiniń segizinshi bıznes forýmynda azyq-túlik qaýipsizdigi, jasyl energetıka máselesi talqylanyp jatyr. Shara kezinde BAQ ókilderiniń saýalyna jaýap bergen Raıymbek Batalov «ArselorMıttal Temirtaý» kompanııasynyń ornyna kelýge nıetti ınvestorlar «Atameken» palatasyna da usynystar túsirip jatqanyn aıtty.
«Ulttyq palatada ulttyq bıznesten de, shetel bıznesinen de „Karmetkombınatqa“ ınvestıtsııa salý máselesi boıynsha túsken usynystar bar. Bular — Shyǵystyń, Reseı Federatsııasynyń, Qytaıdyń, Taıaý Shyǵystyń ınvestorlary. Bul ınvestorlar „Karmetkombınatty“ ınvestıtsııa salatyn kásiporyn retinde qarastyryp otyr. Biraq Úkimet sheshim qabyldaıdy dep oılaımyn. Biz ulttyq palata retinde osy aqparattardy beremiz. Ol aqparatty Úkimet eskeredi dep úmittenemin», — dedi palata basshysy.
