«ArselorMıttal Temirtaýdyń» ornyna keletin menshik ıelerine qandaı shart qoıylady

Qaraǵandy oblysynyń ákimi Ermaǵanbet Bólekpaev «ArselorMıttal Temirtaý» kompanııasynyń ornyna keletin jańa menshik ıelerine qoıylatyn negizgi talaptar týraly aıtty, dep habarlaıdy Kazinform agenttigi.

«Qazir Úkimet pen memleket qoıyp otyrǵan alǵashqy sharttar – árıne, kómir jáne bolat departamentteriniń óndirisine ınvestıtsııa salaý. Bul – oryndalýy kerek birinshi shart. Sondaı-aq negizgi qorlardy jańartý kerek. Onyń ishinde, eń aldymen, árıne, qaýipsizdik kúsheıtilýi qajet. Jańa menshik ıesiniń aldyna osyndaı sharttar qoıylady», –dedi Qaraǵandy oblysynyń ákimi.

Ázirge kómir departamenti basshysynyń mindetin atqarýshy bolyp Vadım Basın taǵaıyndaldy. Ol Qaraǵandy oblysy ákiminiń orynbasary qyzmetinen bosatyldy. Bul týraly aımaq basshysynyń ózi aıtty.

«Iá, Vadım Basın oblys ákimdigindegi qyzmetinen ketti», – dep rastady Ermaǵanbet Bólekpaev.

Eske salaıyq, búgin túnde Qaraǵandy oblysyndaǵy Kostenko atyndaǵy shahtada órt boldy. Saǵat 17.33-tegi málimet boıynsha 33 kenshiniń denesi tabyldy,13 adam izdestirilip jatyr. 20 shahter aýrýhanaǵa jetkizildi. 

Keshqurym brıfıng ótkizgen Tótenshe jaǵdaılar mınıstri Syrym Sháriphanov jer astynda qalǵan kenshilerdi tiri tabýǵa úmit óte az ekenin málim etti.

Kásibı áskerılendirilgen apattyq-qutqarý qyzmetteriniń respýblıkalyq ortalyq shtaby Qaraǵandy fılıaly dırektorynyń orynbasary Jumat Ókenov mert bolǵan kenshilerdiń jeke basyn anyqtaý qıynǵa túsip jatqanyn aıtty.

29 qazan Jalpyulttyq aza tutý kúni bolyp jarııalandy. Memleket basshysy Qasym-Jomart Toqaev Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.