«ArselorMıttal Temirtaýdyń» memleketpen jasaǵan kelisimshart mátini jalpyǵa jarııalanady
Qazaqstan aýmaǵynda qatty paıdaly qazba kenishterin ıgerýshi ERG, «Qazaqmys», «ArselorMıttal Temirtaý» sııaqty alpaýyt kompanııalardyń memleketpen jasaǵan ınvestıtsııalyq kelisimsharttary jalpyǵa qoljetimdi etip jarııalanady, dep habarlaıdy Kazinform.
Bul týraly Ónerkásip jáne qurylys vıvtse-mınıstri Iran Sharhan Ádilet mınıstrliginde ótip jatqan vedomstvoaralyq komıssııa otyrysy kezinde aıtty.
«Qazir qoǵamda burynǵy Qaraǵandy metallýrgııa kombınaty L.Mıttaldyń qolyna qalaı ótkeni týraly daýly pikir kóp. Sarapshylar osyndaı ınvestıtsııalyq kelisimsharttar jarııa túrde bekitilýi kerektigin aıtyp júr. Zańnamaǵa osy turǵyda ózgeris engizesizder me?», - dep surady jýrnalıst vıtse-mınıstrden.
«Bizde qazir halyqaralyq bastama bar. Sol bastamaǵa biz de qosyldyq. Búkil lıtsenzııalardyń, kelisimsharttardyń sharty bizdiń mınıstrlik saıtynda jarııalanady. Kez kelgen adam onymen tanysatyn múmkindik bolady. Osyǵan deıin qol qoıylǵan sharttardyń mátini de jarııalanady. Siz aıtyp otyrǵan «ArselorMıttal Temirtaýdyń» da, kez kelgen jer qoınaýyn paıdalanýshylardyń kelisimsharttary jarııalanady», - dedi ol.
Mınıstr orynbasarynyń sózinshe, zańnamadaǵy bul ózgeris kúshine engenshe biraz ýaqyt kerek.
«Biz bul jumysty bastap kettik. Lıtsenzııalar saıtymyzda jarııalandy da. Al ınvestıtsııalyq kelisimsharttardyń mátinderimen jumys istep jatyrmyz. Osy jyldyń aıaǵyna deıin kelisimsharttardyń jartysyn jarııalap bolamyz. Kelesi jyldyń ortasyna deıin qalǵanynyń bárin tirkep bolamyz. Men munaı salasyn aıtpaı-aq qoıaıyn, tek qana qatty qazbalar boıynsha aıtyp turmyn. «Qazaqmys, «ERG, «Arselor» sııaqty kásiporyndardyń kelisimsharttarynyń mátini jarııalanady», - dedi Iran Sharhan.
