«ArselorMıttal Temirtaýdyń» Qazaqstanda qansha kásiporny bar
Búgin Qaraǵandydaǵy Kostenko atyndaǵy shahtada bolǵan órtten 33 adam qaza boldy. Atalǵan shahta «ArselorMıttalTemirtaý» kompanııasynyń menshiginde. Eki aı buryn kompanııanyń «Qazaqstan» shahtasynda da apat bolyp, 5 kenshi ajal qushty. Búgin Memleket basshysy Úkimetke «ArselorMıttalTemirtaýmen» ınvestıtsııalyq yntymaqtastyqty toqtatýdy tapsyrdy. Osy oraıda Kazinform atalǵan kompanııanyń Qazaqstandaǵy ónerkásipterine sholý usynady.
Kompanııa 1995 jylǵy qarasha aıynan beri Qazaqstan aýmaǵynda jumys isteıdi. 1995 jyly 17 qarashada Qaraǵandy metallýrgııa kombınaty «LNM Group» menshigine ótip, «Ispat-Karmet» AAQ retinde jumys isteı bastady. 2004 jyly «Ispat-Karmet» AAQ «Mıttal Stıl Temirtaý» AQ bolyp ózgertildi jáne 2007 jyly – «Mıttal Stıl Temirtaý AQ «ArselorMıttal Temirtaý» AQ bolyp ózgertildi.
1996 jyly maýsymda kompanııanyń Kómir departamenti quryldy jáne jylyna 7 mln tonnadan astam koksteletin kómir óndirý qýattylyǵyna ıe boldy. Qazirgi ýaqytta bul departamentte Qaraǵandy oblysyndaǵy 8 kómir shahtasy bar. Olar: Abaı (1961 j.), Saran (1955 j.), Qazaqstan (1969 j.), Shahtınsk (1973 j.), Tentek (1979 g.), Kostenko atyndaǵy (1934 j.), Lenın atyndaǵy (1964 j.) jáne Kúzembaev atyndaǵy (1959 j.) shahtalar.
Kompanııaǵa «Vostochnaıa» ortalyq ken baıytý fabrıkasy da tıesili. Fabrıka 1980 jyly paıdalanýǵa berilgen, jobalyq qýaty – jylyna 6 mıllıon tonna kómir jáne Qazaqstan Respýblıkasynyń iri kómir óńdeý kásiporny bolyp sanalady.
Qazirgi ýaqytta bul fabrıka «ArselorMıttal Temirtaý» AQ kómir shahtalarynda óndiriletin KJ, K jáne KO markaly baıytylýy qıyn kómirdi qaıta óńdeıdi. Zaýyt jumys istegen ýaqyt aralyǵynda 123 mln tonnadan astam kómir óńdelip, 63,3 mln tonna koks kontsentraty shyǵarylǵan.
Oǵan qosa, Qaraǵandy oblysynyń aýmaǵynda (Qaraǵandy, Saran, Abaı, Shahtınsk) ornalasqan jer ústindegi qosalqy kásiporyndary bar: «Taý-ken mashınalary» zaýyty; «Kómirservıs» mamandandyrylǵan shahtamontajdaý-jóndeý kásiporny; «Mamandandyrylǵan shahtamontajdegazatsııa» basqarmasy; Tehnologııalyq kólik, shahta qurylysy, «Energokómir» jáne tıeý-kólik basqarmalary, Qaraǵandy kómir energııa zaýyty jáne basqalary.
Ortalyq jáne Soltústik Qazaqstanda kompanııanyń temir rýdaly 4 kásiporny bar. Kásiporyndar Lısakovsk, Kentóbe, Atasý, Atansor jáne 2 jylý-energetı ortalyqtarynda («Paýer Netvorks» JShS jáne «Energokómir» PÝ) ken oryndarynda temir kenin óndiredi, óńdeıdi jáne baıytady.
Sondaı-aq «ArselorMıttal» kompanııasynyń qubyr basqarmasynda «ArcelorMittal Tubular Products Aktau» AQ zaýyty bar. Bul zaýyt – Qazaqstandaǵy úlken dıametrli bolat qubyrlardyń jalǵyz óndirýshisi.
Eske salaıyq, 28 qazan, túngi saǵat 02.33-te Qaraǵandy oblysyndaǵy Kostenko atyndaǵy shahtada órt boldy. Saǵat 17.33-tegi málimet boıynsha 33 kenshiniń denesi tabyldy,13 adam izdestirilip jatyr. 20 jumysshy aýrýhanaǵa jetkizildi.
"ArselorMıttal Temirtaý" AQ-ǵa tıesili 8 shahtanyń jumysy ýaqytsha toqtatyldy.
Keshqurym brıfıng ótkizgen Tótenshe jaǵdaılar mınıstri Syrym Sháriphanov jer astynda qalǵan kenshilerdi tiri tabýǵa úmit óte az ekenin málim etti.
Kásibı áskerılendirilgen apattyq-qutqarý qyzmetteriniń respýblıkalyq ortalyq shtaby Qaraǵandy fılıaly dırektorynyń orynbasary Jumat Ókenov mert bolǵan kenshilerdiń jeke basyn anyqtaý qıynǵa túsip jatqanyn aıtty.
Prezıdent Q.Toqaev 29 qazandy jalpyulttyq aza tutý kúni etip jarııalaıtyn Ókimge qol qoıdy.
Memleket basshysy Qasym-Jomart Toqaev Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.
QR Úkimeti apattan qaza tapqandardyń otbasylaryna qandaı kómek kórsetiletinin jarııalady.
Apatqa baılanysty Reseı, Belarýs, Ózbekstan, Qyrǵyzstan, Frantsııa prezıdentteri men Túrkııa Syrtqy ister mınıstrligi kóńil aıtty.
Kazinform «ArselorMıttalTemirtaý» tarıhynda qandaı apattar bolǵany týraly sholý usynǵan bolatyn.
