«ArselorMıttal Temirtaýdyń» ınvestory qandaı krıterıımen tańdaldy
QR Ónerkásip jáne qurylys mınıstri Qanat Sharlapaev «ArselorMıttal Temirtaýdyń» jańa ınvestory qandaı krıterıımen tańdalǵanyn aıtyp berdi, dep habarlaıdy Kazinform.
«Jańa qazaqstandyq ınvestor úshin sheshim qabyldaý ortalyǵy Qazaqstan bolýǵa tıis. Bul Qazaqstanda jumys istegisi kelmeıtin adamdar bolmaýy kerek. Bul – bizdiń ustanymymyz. Eger ınvestor nemese ınvestorlar toby úshin sheshim qabyldaý ortalyǵy Qazaqstan bolsa, bul anaǵurlym durys tańdaý bolýy múmkin», - dedi Qanat Sharlapaev Úkimet úıinde ótken baspasóz máslıhatynda.
Mınıstr Allur Group kompanııalar tobynyń qazirgi bıznesi men bolat óndirisi arasynda yqtımal sınergııa bar.
«Búginde kólikter áli de metaldan jasalatynyn bári biledi. Osyǵan baılanysty Qarmette (AMT) avtomobıl bolatyn óndirý jáne ony qoldanystaǵy bıznestermen biriktirý – qalypty bıznes-logıka. Óıtkeni, bul úlken logıstıkalyq shyǵyndardy azaıtýǵa, óndiristi tereńdetip, jergilikti úlesti arttyrýǵa múmkindik beredi. Sondaı-aq, bul jalǵyz adam qabyldaǵan sheshim bolmaǵany túsinikti. Oǵan kóptegen adam qatysty. Úkimettik komıssııa ınvestorlardy tańdaýmen aınalysty jáne biz bul jumystardy kim isteı alatynyn anyqtadyq», - deıdi Qanat Sharlapaev.
Buǵan deıin Q. Sharlapaev Qazaqstan ArcelorMittal-dyń eki kásipornyn 3,5 mlrd dollardan 286 mln dollarǵa arzandatyp alǵanyn, muny elimizdiń iri jáne tabysty kelissózi bolǵanyn aıtqan edi.
Aıta keteıik, búgin «ArselorMıttal Temirtaýdyń» jańa ınvestory anyqtaldy. Jańa ınvestor – qazaqstandyq bıznesmen Andreı Lavrentev. Ol 1979 jyly Almaty qalasynda dúnıege kelgen. «Allur Group» kompanııalar tobynyń Dırektorlar keńesiniń tóraǵasy, onyń quramynda «Agromashholdıng» jáne «SaryarqaAvtoProm» JShS bar. Kompanııalar toby Chevrolet, KIA, JAC jáne LADA avtobrendteriniń Qazaqstan aýmaǵyndaǵy resmı óndirýshisi jáne dıstrıbıýtory.
Sondaı-aq, «ArselorMıttal Temirtaýdyń» ataýy «Qarmet» dep ózgerýi múmkin.
Kazinform agenttigi «ArselorMıttalTemirtaý» tarıhynda qandaı apattar bolǵanyna sholý jasaǵan edi.
