«ArselorMıttal Temirtaýdyń» aktıvin satyp alýǵa bıýdjetten aqsha jumsamaımyz – Qanat Sharlapaev

Úkimet otyrysynan keıingi baspasóz konferentsııada Ónerkásip jáne qurylys mınıstri Qanat Sharlapaev «ArselorMıttal Temirtaýdyń» aktıvterin qaıtarýǵa bıýjet qarjysy jumsalmaıtynyn aıtty, dep habarlaıdy Kazinform.

«Bul kompanııany Qazaqstan paıdasyna alý qanshaǵa túsýi múmkin? Biz olıgarh Mıttalǵa qandaı da bir soma tóleýmiz kerek qoı?» - dep surady jýrnalıst.

Mınıstr «ArselorMıttal Temirtaý» kásipornynyń aktsıoneri qundy qaǵazdar naryǵyna qatysatyn jarııa kompanııa ekenin atap ótti.

«Bul - álemdegi metal men bolat óndirýshi ekinshi kompanııa, ıaǵnı bul jerde biz birinshi kezekte jarııa kompanııa bolyp esepteletin zańdy tulǵamen dıalog júrgizip jatyrmyz. Biz qazir kásiporyn aktıvin Qazaqstan Respýblıkasynyń paıdasyna ótkizýge mindetteıtin zańdy qujatqa qol qoıǵansha kelisimniń qandaı da shartyn bir aıta almaımyz. Óıtkeni, ol - jarııa kompanııa. Kelisimde qandaı bir tólem týraly sharttar engizilse, «ArselorMıttalǵa» qandaı da bir bolashaq shyǵyndardy ótemeımiz. Bul - birinshiden. Ekinshiden, biz bul aktıvti satyp alýǵa bıýdjet qarajatyn jumsaýdy josparlap otyrǵan joqpyz», - dedi Qanat Sharlapaev.