«ArselorMıttal Temirtaýdy» memleket menshigine alý rásimi aıaqtalýǵa jaqyn - Úkimet basshysy

ASTANA. KAZINFORM - Úkimet otyrysynda Premer-Mınıstr Álıhan Smaıylov «ArselorMıttal Temirtaýdy» Qazaqstan paıdasyna berý rásimi qandaı satyda ekenin málim etti.

Úkimet basshysy atalmy kásiporyn shahtalarynda apattyń jıi bolatynyn basshylyqtyń óndiriske bas qatyrmaıtynymen baılanystyrdy.

«Mundaı áreketsizdiktiń saldary birneshe jyldar boıy qaıǵyly jaǵdaılarǵa ákep soǵýda. Kompanııa óz mindettemelerin oryndaǵan joq. Qazirgi tańda, «ArselorMıttal Temirtaý» kompanııasyn Qazaqstannyń paıdasyna berý rásimderi aıaqtalý satysynda. Komıssııa apattyń sebepterin jan-jaqty tekserip, oǵan kináli adamdardy anyqtaý jumystaryn jalǵastyrady», - dedi Premer-Mınıstr.

Sondaı-aq, ol Qaraǵandy oblysynyń ákimdigi men Tótenshe jaǵdaılar mınıstrligi apatty joıýǵa kúsh salý kerektigin aıtty.

«Eń bastysy – qaza tapqandardyń otbasylaryna barlyq kómekti kórsetip, zardap shekkenderdiń densaýlyqtaryn qalpyna keltirý. Osyndaı qıyn jaǵdaıda eshkim de nazardan tys qalmaıdy», - dedi Álıhan Smaıylov.

Aıta keteıik, 28 qazan saǵat 02:33-te Qaraǵandy oblysyndaǵy Kostenko atyndaǵy shahtada apat boldy. Sońǵy málimet boıynsha, qazaq tapqandar sany 46-ǵa jetken.  Osyǵan baılanysty Qazaqstanda 29 qazan Jalpyulttyq aza tutý kúni bolyp jarııalandy.