«ArselorMıttal» Temirtaýdan kete me – Qanat Sharlapaevtyń jaýaby

Úkimettegi baspasóz máslıhatynda Ónerkásip jáne qurylys mınıstri Qanat Sharlapaev «ArselorMıttal Temirtaýdyń» ornyna basqa ınvestor ákelý qanshalyqty múmkin ekeni týraly suraqqa jaýap berdi, dep habarlaıdy QazAqparat tilshisi.

«Investordy aýystyrý – bul bir ınvestordyń óz ornyna basqa ınvestordy ákelý erki. Bireý ketip, óz úlesin basqa bir tulǵaǵa berý kerek. Bul jaǵdaıda ágime mynandaı. Memleket jumys istep jatqan tosyn jaıttar jeterlik. Osy jumystar bitken kezde kásiporynǵa sol jumystardyń qorytyndysynyń áseri bolady dep oılaımyn», - dedi ol.

Mınıstr ınvestor Qazaqstanda jumys istegisi kelse, zańdarǵa baǵynýy kerektigin atap ótti.

«Jaýapkershilik turǵysynda elimizde kóp dúnıe jasalyp jatyr dep oılaımyn. Adamdar qazasyna baılanysty qylmystyq ister qozǵaldy, quzyrly organdar tergep, tekserip jatyr. Buryn bolǵan dúnıe týraly pikir bildire almaımyn. Jaqynda adam qazasy tirkelgen tosyn oqıǵa boıynsha qozǵalǵan is qazir tergeý satysynda tur. Tergeý barysyna pikir bildirmeımin», - dedi Qanat Sharlapaev.