«ArselorMıttal Temirtaý» resmı túrde QARMET bolyp ózgerdi
Qaraǵandy oblysynyń ákimi Ermaǵanbet Bólekpaev QARMET jańa ınvestory Andreı Lavrentevti eńbek ujymyna tanystyrdy. Óz kezeginde ol Vadım Basındi kompanııanyń bas dırektory dep jarııalady, dep habarlaıdy Kazinform.
Qazaqstandyq Qazaqstan Steel Group (QSG) kompanııasy burynǵy ArcelorMittal Temirtau kásipornyna ınvestor boldy.
Kompanııa atynan kásipker Andreı Lavrentev Ónerkásip jáne qurylys mınıstrligimen birge ArcelorMittal Temirtau aktıvterin satyp alý kelisimine qol qoıdy.
«Kelisim sharty boıynsha QSG AMT aktıvteri $286 mln-ǵa satyp alyndy, sondaı-aq jyl saıynǵy 4 ret teń jarnamen tólenetin $450 mln mólsherindegi qarajat kepildi túrde keıinge qalǵan tólemdi júzege asyrady. Sonymen qatar, kelisim jabylǵan kezde taǵy AMT-nyń ótelmegen topishilik qaryzyn tóleý úshin 250 mıllıon dollar tólenedi», — dep habarlady Qaraǵandy oblysy ákimdigi.
Kelisimge saı kompanııa keıinnen $3 mlrd astam qarjyny ınvestıtsııalaý mindettemesin ózine alady, onyń ishinde 1,3 mlrd dollar kelesi jyly ınvestıtsııalanady.
«Árıne, kompanııanyń jańa ıesiniń aldynda mańyzdy mindetter tur, birinshi kezekte — eńbek qaýipsizdigin qamtamasyz etý jáne jaǵdaı jasaý, qyzmetkerlerdiń ál-aýqatyn arttyrý, sondaı-aq áleýmettik jobalar arqyly jergilikti qoǵamdastyqty damytýǵa belsendi qatysyp, kómek kórsetýi kerek», — dedi Ermaǵanbet Bólekpaev.
Kezdesýde Vadım Basın QARMET kompanııasynyń bas dırektory retinde tanystyryldy.
Ulttyq ınvestor qysqa merzim ishinde jumys barysyndaǵy ujymdyq kelisimshart pen kásiporyn jumysshylarynyń eńbekaqysyn tóleý júıesiniń saqtalýyn, óndiris ornynyń qaýipsizdigin jáne ekologııalyq ahýalyn odan ári jaqsartý, óndiristi jańǵyrtý jáne qaıta uıymdastyrý, shyǵarylatyn ónim kólemin, nomenklatýrasyn jáne túrlerin ulǵaıtý sekildi mindettemelerdi óz jaýapkershiligine alyp otyr.
Kompanııa kásiporynnyń qyzmetine taldaý júrgizgennen keıin naqty málimetti ınvestordyń resmı ókilderi arqyly beretinin habarlaıdy.
