«ArselorMıttal Temirtaý» qaıtadan «Qarmet» dep atalýy múmkin

Ónerkásip jáne qurylys mınıstri Qanat Sharlapaev «ArselorMıttal Temirtaý» kompanııasynyń ataýyn aýystyrý jóninde pikirin bildirdi, dep habarlaıdy Kazinform.

«Kompanııanyń rebrendıngin jańa ınvestor naqty bekitedi. Bizdiń pikirimizshe, burynǵy tarıhı „Qarmet“ ataýyn qaıtarý qajet. Muny qyzmetkerler men turǵyndar da qoldaıdy dep oılaımyn», — dedi Qanat Sharlapaev Úkimette ótken brıfıngte.

Aıta keteıik, «ArselorMıttal Temirtaý» AQ memleket menshigine qaıtarý kelissózderi aıaqtaldy. AMT eki kásipornynyń quny 286 mln dollarǵa baǵalanǵan.

Jańa ınvestor — qazaqstandyq bıznesmen Andreı Lavrentev. Ol 1979 jyly Almaty qalasynda dúnıege kelgen. «Allur Group» kompanııalar tobynyń dırektorlar keńesiniń tóraǵasy, onyń quramynda «Agromashholdıng» jáne «SaryarqaAvtoProm» JShS bar.

Sondaı-aq, «ArselorMıttal Temirtaý» «Qazaqstan halqyna» qoryna 16 mlrd teńge qaıyrymdylyq qarjy aýdarady. Bul qarajattyń 50 paıyzy Temirtaý qalasyna jáne qalǵany Qaraǵandy oblysyn damytýǵa jumsalady.