ArcelorMittal «Qazaqstan halqyna» qoryna 16 mlrd teńge aýdarady
Bul týraly Ónerkásip jáne qurylys mınıstri Qanat Sharlapaev Úkimette ótken brıfıngte aıtty, dep habarlaıdy Kazinform.
QR Úkimeti men ArcelorMittal korporatsııasy «ArselorMıttal Temirtaý» AQ-ny Qazaqstanǵa berý týraly mámilege keldi. Onda Ónerkásip jáne qurylys mınıstrligi men Ádilet mınıstrligi ókilderinen quralǵan kelissózder toby ArcelorMittal kompanııasyn «Qazaqstan halqyna» qaıyrymdylyq qoryn qoldaý úshin 16 mlrd teńge kóleminde jarna jasaýǵa kóndirdi.
«ArcelorMittal kompanııasynan qorǵa túsetin qarajat Qaraǵandy oblysy turǵyndarynyń ózekti máselelerin sheshýge jáne densaýlyq saqtaý, bilim berý salasyndaǵy áleýmettik jobalardy júzege asyrýǵa baǵyttalady. Sondaı-aq bul somanyń 50%-y Temirtaý qalasyna jumsalady, qalǵany Qaraǵandy oblysyna jumsalady», — dedi Ónerkásip mınıstri.
Aıta keteıik, búgin «ArselorMıttal Qazaqstannyń» jańa ınvestory anyqtaldy.
Jańa ınvestor — qazaqstandyq bıznesmen Andreı Lavrentev. Ol 1979 jyly Almaty qalasynda dúnıege kelgen. «Allur Group» kompanııalar tobynyń Dırektorlar keńesiniń tóraǵasy, onyń quramynda «Agromashholdıng» jáne «SaryarqaAvtoProm» JShS bar. Kompanııalar toby Chevrolet, KIA, JAC jáne LADA avtobrendteriniń Qazaqstan aýmaǵyndaǵy resmı óndirýshisi jáne dıstrıbıýtory.
Sondaı-aq, «ArselorMıttal Temirtaýdyń» ataýy «Qarmet» dep ózgerýi múmkin.
Eske sala ketsek, 28 qazan kúni túngi saǵat 02.33-te Qaraǵandy oblysyndaǵy Kostenko atyndaǵy shahtada órt tutanyp, artynan jarylys boldy. Jer astynda jumys istep jatqan 252 kenshiniń 206-sy óz betimen joǵary shyqty.
31 qazan kúni 45 kenshiniń denesi jáne qaza tapqan 46-shy adamnyń dene bólshekteri tabyldy.
Qaraǵandy óńirine barǵan Memleket basshysy Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi.
Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.
Kazinform agenttigi «ArselorMıttalTemirtaý» tarıhynda qandaı apattar bolǵanyna sholý jasaǵan edi.
