«ArselorMıttal Temirtaýǵa» tıesili jylý elektr ortalyǵy 77 paıyz tozǵan
«Sońǵy jyldary «ArselorMıttal Temirtaý» aktsıonerlik qoǵamynyń №2 jylý elektr ortalyǵy qazandyqtarynyń nashar tehnıkalyq jaǵdaıyna baılanysty jıi isten shyǵýy saldarynan Temirtaý qalasynyń turǵyndarynda jylý energııasynyń tapshylyǵy oryn aldy. №2 jylý elektr ortalyǵy negizgi jabdyqtaryn jóndeýge bólinetin qarajat fızıkalyq tozý men apattylyq deńgeıin tómendetpedi. JEO-nyń negizgi jabdyǵynyń ortasha tozý kórsetkishi 77%-dy quraıdy. Jylytý maýsymynda 5 qazandyq jumys istep, 1 qazandyq rezervte bolýy tıis», - degen mınıstr elektr stansasyndaǵy jylý qýatynyń tómendeýi saldarynan Temirtaý qalasynyń tutynýshylaryna 2 táýlik boıy jylý tapshylyǵy týyndaǵanyn eske saldy.
«Osy fakti boıynsha Atom jáne energetıkalyq qadaǵalaý men baqylaý komıtetiniń Qaraǵandy oblysy boıynsha aýmaqtyq departamenti 10-25 naýryz aralyǵynda «ArselorMıttal Temirtaý» aktsıonerlik qoǵamynyń №2 jylý elektr ortalyǵyna qatysty elektr energetıkasy salasyndaǵy normatıvtik quqyqtyq aktileriniń talaptaryn saqtaý turǵysynan jospardan tys tekserý júrgizdi. Tekserý qorytyndysy boıynsha qazandyqtar men qazandyq tsehynyń ǵımarattaryn paıdalanýǵa qoıylatyn talaptardyń buzylǵany anyqtaldy. «ArselorMıttal Temirtaý» aktsıonerlik qoǵamyna №2 jylý elektr ortalyǵyndaǵy №7 qazan qurylysyn jedeldetý, sondaı-aq 2-shi jylý elektr ortalyǵyn jańǵyrtýdyń perspektıvalyq josparyn ázirleý qajet dep sanaımyz», - dedi Energetıka mınıstri.
