ArselorMıttal Temirtaýǵa taǵy aıyppul salyndy

QARAǴANDY. QazAqparat - Іri salyq tóleýshilerge qatysty júrgizilip jatqan salyqtyq ákimshilendirý sheńberinde «ArselorMıttal Temirtaý» AQ-da 2019 jylǵa korporatıvtik tabys salyǵy boıynsha avanstyq tólemder somasyn tómendetkendigi anyqtaldy. Bul týraly Qaraǵandy oblysy boıynsha Memlekettik kirister departamenti málimdedi, dep habarlaıdy QazAqparat.

Kameraldyq monıtorıng júrgizý kezinde naqty eseptelgen korporatıvtik tabys salyǵynyń málimdelgen avanstyq tólemder somasynan 20%-dan asyp ketýi belgili boldy. Osyǵan baılanysty ÁQBtK-niń 278-babynyń 3-bóligi boıynsha 1,2 mlrd teńgeden astam aıyppul somasyna ákimshilik materıal toltyryldy.

Bıylǵy naýryz aıynda «ArselorMıttal Temirtaý» AQ apellıatsııalyq shaǵymyn qaraý barysynda Qaraǵandy oblystyq soty departamenttiń dálelderin qoldady jáne ákimshilik aıyppul kúshinde qaldy.

Esterińizge sala keteıik, 2022 jyldyń qarasha aıynda departament qyzmetkerleri 2017 jyl úshin osyndaı buzýshylyqty anyqtaǵan bolatyn, bıýdjetke 1,3 mlrd teńge kóleminde aıyppul tolyq kólemde óndirildi.

2017 jáne 2019 jyldary anyqtalǵan buzýshylyqtar boıynsha aıyppuldyń jalpy somasy 2,5 mlrd teńgeden asty.