«ArselorMıttal Temirtaýdyń» Qazaqstanda qalý-qalmaýyna qatysty sheshim jaqynda qabyldanady – Erlan Qoshanov
«Qazaqstan» shahtasyndaǵy adam ólimine ákep soqtyrǵan qaıǵyly oqıǵa bárimizdiń qabyrǵamyzdy qaıystyrdy. Bul – úlken qasiret. Qaza bolǵandardyń týystary men jaqyndarynyń qaıǵysyna ortaqtasyp, kóńil aıtamyn. Zardap shekkender tezirek saýyǵyp ketýin tileımin.
Memleket basshysy bul oqıǵaǵa óz baǵasyn berdi. Qaıtalanyp jatqan mundaı jazataıym oqıǵalar men adam ólimi «Arselor Mıttal Temirtaý» kompanııasynyń jumysshylar úshin qaýipsiz eńbek jaǵdaıyn qamtamasyz ete almaı otyrǵanyn kórsetti. Buǵan ne sebep bolǵanyn – nemquraılylyq nemese qasaqana áreketter me, ony tergeý kórsetedi. Prezıdent Úkimetke jáne Qaraǵandy oblysynyń ákimdigine tıisti tapsyrmalar berdi. Premer-mınıstr oqıǵa ornyna bardy. Osy óńirden saılanǵan Májilis depýtattary da Shahtınskide júr», - dep jazdy Májilis tóraǵasy Facebook jelisinde.
Onyń aıtýynsha, «ArselorMıttal Temirtaý» basshylyǵymen talaı ret joǵary deńgeıde kezdesýler ótkizilip, onda óndiris qaýipsizdigine erekshe kóńil bólingen. Alaıda keıingi jaǵdaı tıisti qorytyndy jasalmaǵanyn kórsetip otyr.
Eske salaıyq, «Qazaqstan» shahtasynda órt 17 tamyz kúni saǵat 10:05-te tutandy.
Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.
5 jumysshynyń taǵdyry belgisiz boldy. Keıin olardyń biriniń denesi tabyldy. Qalǵan 3 adamdy izdestirý jumysy jalǵasty.
Qaraǵandydaǵy kómir shahtasynda zardap shekkenderdiń arasynda eki adam jansaqtaý bóliminde jetkizilgeni týraly habarlaǵan edik.
Aıta keteıik, Prezıdent «Qazaqstan» shahtasynda bolǵan órt sebebin anyqtaý úshin jan-jaqty tergeý júrgizýdi tapsyrdy.
