«ArselorMıttal Temirtaýdyń» eks-dırektory Qazaqstannan qýylady

QARAǴANDY. QazAqparat - Temirtaý qalalyq soty «ArselorMıttal Temirtaý» kompanııasynyń qyzmetkerler jónindegi dırektory Anna Adomdy Qazaqstan aýmaǵynan shyǵaryp jiberý týraly sheshim shyǵardy, ol eńbek zańnamasyn buzǵany úshin aıyptalǵan bolatyn, dep habarlaıdy QazAqparat tilshisi. 

«Іs Qaraǵandy oblystyq ІІD ótinishi boıynsha qaraldy. QR Azamattyq protsestik kodeksiniń 223, 226 jáne 385-baptaryna sáıkes, sot Belarýs azamaty Anna Adomdy Qazaqstan aýmaǵynan shyǵaryp jiberý jóninde sheshim qabyldady. Sot sheshiminiń oryndalý merzimi - 10 kún», - dep málimdedi Qaraǵandy oblystyq sotynyń baspasóz hatshysy Gúlbarshyn Jitikova.

42 jastaǵy Anna Adom 2016 jyly metallýrgııa kombınatynyń qyzmetkerler jónindegi dırektory bolyp taǵaıyndalǵan.

Budan tys, Temirtaý qalalyq sotynyń sheshimimen deportatsııalaýǵa ketetin shyǵyndardyń barlyǵy Anna Adomnyń ózine júkteldi. Odan 1203 teńge mólsherinde memlekettik baj óndiriledi.

Eske sala keteıik, byltyr jeltoqsanda Temirtaýda «ArselorMıttal Temirtaý» kompanııasynyń qyzmetkerler jónindegi dırektory Anna Adomǵa qatysty sot protsesi bastalǵan bolatyn. Qalalyq sottyń sheshimi boıynsha ol eńbek zańnamasyn buzdy dep tanylyp, 80 saǵattyq qoǵamdyq jumysqa úkim etildi. Budan tys, sot Adomnyń bir jyl boıy «ArselorMıttal Temirtaý» kompanııasynda basshylyq laýazymdy ıelenýine tyıym saldy.