ArselorMıttal Temirtaýda adam ólimi faktisi boıynsha qylmystyq is qozǵaldy
QARAǴANDY. QazAqparat – Qaraǵandy oblysynyń polıtsııa departamenti «ArselorMıttal Temirtaý» AQ tsehtarynyń birinde 4 adamnyń qaza bolý faktisi boıynsha qylmystyq is qozǵady, dep habarlaıdy QazAqparat tilshisi.
Esterińizge sala keteıik, 2022 jyldyń 10 maýsymynda «Qurylysmet»« JShS aýmaǵynda «ArselorMıttal Temirtaý» AQ qyzmetkerleri qaıǵyly oqıǵaǵa ushyraǵan bolatyn.
Otqa tózimdi qalaýdy bólshekteý kezinde usta-press tsehynyń №9 jumys istemeıtin termııalyq peshinde shatyr qulady. Sonyń saldarynan (kólemi 5h5h10 m) úıindilerdiń astynda 5 adam qalyp qoıdy.
Olardyń tórteýi qaıtys boldy, bireýi - 1994 jyly týǵan jumysker aýrýhanaǵa jetkizildi.
«Atalǵan fakti boıynsha QK 277-baby 3-bóligi (Eki nemese odan da kóp adamnyń abaısyzda ólimine ákep soqqan taý-ken nemese qurylys jumystaryn júrgizý qaýipsizdigi erejelerin buzý) boıynsha qylmystyq is tirkeldi. Oqıǵa ornynda Temirtaý qalasynyń polıtsııa departamenti men polıtsııa basqarmasynyń jedel-tergeý toptary jumys isteýde. Jaǵdaı anyqtalýda», - dep habarlady Qaraǵandy oblysy PD baspasóz qyzmeti.
Qazirgi ýaqytta oqıǵa ornynda Qaraǵandy oblysy TJD qutqarýshylary (27 adam jáne 7 birlik tehnıka) jáne «Seriktes Órt Sóndirýshi» JShS qyzmetkerleri (10 adam jáne 2 birlik tehnıka) úıindilerdi arshyp jatyr.
Oqıǵa ornynda Qaraǵandy oblysynyń ákimi Jeńis Qasymbek, TJD jáne ónerkásiptik qaýipsizdik basshylary bar.
«QR qoldanystaǵy eńbek zańy aıasynda arnaıy tergeý júrgizilýde. Mán-jaılar men sebepter anyqtalyp, habarlanatyn bolady», - dep túsindirdi Qaraǵandy oblysynyń eńbek ınspektsııasy basqarmasynyń bólim basshysy Sahıbjamal Safarova.
Eńbek kodeksiniń talaptaryna sáıkes eńbek jónindegi ýákiletti organnyń ókimimen komıssııa qurylady jáne jazataıym oqıǵaǵa arnaıy tekserý júrgiziledi. Nátıjeler týraly qosymsha habarlanatyn bolady.
