«ArselorMıttal Temirtaý» úsh kenshi qaza tapqan apattyń mán-jaıyn habarlady
ASTANA. QazAqparat - «ArselorMıttal Temirtaý» AQ kompanııasynyń basshylyǵy men qyzmetkerleri búgin tańerteń Shahtınsk qalasynda qaza tapqan kenshilerdiń týystary men jaqyndaryna kóńil aıtty.
«Qaza tapqandardyń otbasyna tolyq kólemde kómek kórsetiledi. Jerleý rásiminiń barlyq shyǵyndaryn kompanııa óz moınyna alady», - delingen «ArselorMıttal Temirtaý» AQ habarlamasynda.
Kompanııa basshylyǵy «Qazaqstan» shahtasyndaǵy úsh kenshi qaza tapqan qaıǵyly jaǵdaıdyń mán-jaıyn habarlady.
Oqıǵa tańerteń bolǵan. 31 tamyz kúni tańǵy saǵat tórtten óte AGQ (avtomattandyrylǵan gaz qorǵanysy) operatory taý dıspetcherine 332 D6-1-3 jeldetkish túıisiminde metan kenjardy baqylaý tetiginen baılanys joǵalǵany týraly jáne shahtanyń batys jeldetkish uńǵysynda metan deńgeıiniń kóterilgenin habarlaǵan. Shahta basshylyǵy tez arada jaǵdaıdy anyqtaý sharalaryn júrgizgen: kenjarǵa Kásibı áskerılendirilgen apattyq qutqarý qyzmetiniń eki bólimshesi men sol ýchaskeniń taý sheberin jibergen.
Tańǵy saǵat 6-da úńgýshiler osy kenjardan óli kúıinde tabyldy. Aldyn ala derek boıynsha qaıǵyly jaǵdaı kenetten metannyń (gaz dınamıkalyq qubylys) taralýy saldarynan bolǵan. Oqıǵa kezinde shahtada 132 adam bolǵan, onyń 129-y apatty joıý josparyna sáıkes ózderi jerdiń betine shyqqan.
Kásibı áskerılendirilgen apattyq qutqarý qyzmetiniń 49 qyzmetkeri men 9 tehnıka apatty joıý jumystaryn júrgizýge tartyldy. Shahtadaǵy jumys ýaqytsha toqtatyldy. Oqıǵanyń mán-jaıyn anyqtaý úshin arnaıy memlekettik komıssııa quryldy, tergeý júrip jatyr. Tergeý nátıjesi komıssııa jumysy aıaqtalǵannan keıin belgili bolady.
