«ArselorMıttal Temirtaý» shahtasynda apat boldy
TEMІRAÝ. QazAqparat - 13 qańtarda saǵat 21.53-te «ArselorMıttal Temirtaý» AQ «Lenın atyndaǵy» shahtasynda apart boldy, dep habarlaıdy QazAqparat TJM silteme jasap.
«Apat bolǵan kezde úsh jumysshy, atap aıtqanda burǵylaý qondyrǵysynyń mashınısi, mashınıstiń kómekshisi, sondaı-aq jeldetý jáne qaýipsizdik tehnıkasy ýchaskesiniń taý-ken sheberi uńǵyma túbinde barlaý jumystaryn júrgizip jatqan. Tótenshe oqıǵa saldarynan taý-ken sheberi men mashınıstiń kómekshisi apat ornynan dereý ketip qaldy, al mashınıst uńǵyma túbinen shyǵa almady», - delingen habarlamada.
Apat kezinde shahtada úshinshi aýysymnyń 137 qyzmetkeri bolǵan. Olardyń 136-sy jer betine shyǵaryldy.
«Kásiporynnyń avarııalyq-qutqarý qyzmeti kelgennen keıin dereý shahtaǵa tústi. Saǵat 23.00-de aerogazdy baqylaý apparatýrasynyń kórsetkishterine sáıkes shahtanyń taý-ken qazbalaryndaǵy gaz jaǵdaıy qalypqa keldi. Avarııalyq-qutqarý qyzmetiniń bólimshesi uńǵyma túbindegi taý-ken massasyn tazalaýda. Zardap shekken bir adamdy izdestirý jumystary jalǵastyrylýda. Іzdestirý jumystaryna shahtanyń 17 qyzmetkeri men avarııalyq-qutqarý qyzmetiniń eki bólimshesi (16 adam) jumyldyryldy»,- dedi TJK.
Atalǵan apatty tekserý úshin QR TJM Ónerkásiptik qaýipsizdik komıtetiniń Qaraǵandy oblysy boıynsha departamentiniń janynda komıssııa quryldy.
