ArselorMıttal Temirtaý Shahandaǵy apatta jetim qalǵan qyzdyń oqý aqysyn tóleıdi

QARAǴANDY. QazAqparat - Qaraǵandy oblysyndaǵy Shahan kentinde turǵyn úı apatynan zardap shekkenderge «ArselorMıttal Temirtaý» AQ 36,7 mln teńge kóleminde kómek kórsetedi, dep habarlaıdy «QazAqparat» HAA tilshisi kompanııanyń baspasóz qyzmetine silteme jasap.

Úı apatynan zardap shekkenderge materıaldyq kómek retinde «ArselorMıttal Temirtaý» qyzmetkerleri 12 mıllıon teńge bóldi, kompanııa oǵan 24,7 mıllıon teńge qosty. Negizgi soma apatta kóz jumǵan kompanııa qyzmetkerleriniń týystaryna kómek retinde jiberiledi jáne qalǵan bóligi zardap shekkenderge jumsalady», - delingen habarlamada.

«ArselorMıttal Temirtaý» shahtalarynda jumys istegen Vıtalıı Andropov pen Vladımır Galyshev úıindi astynda mert boldy.

«Andropovtar otbasynan 7 jasar Polına ǵana aman qaldy. Aldaǵy ýaqytta kómir departamenti Qazaqstannyń arnaıy orta jáne joǵary bilim berý mekemelerindegi Polınanyń oqý aqysyn tóleıdi», - dep atap ótti baspasóz qyzmeti.

Kompanııa basshylyǵy qaza tapqandardyń týystarymen kezdesti. «Bizdiń ujym sizderdiń qaıǵylaryńyzǵa ortaqtasady», - dep kóńil aıtty «ArselorMıttal Temirtaý» AQ bas dırektory Paramjıt Kalon.
Aıta keteıik, 1 qańtar kúni 22 saǵat 40 mınýtta jylý qazandyǵy jarylýynyń saldarynan Qaraǵandy oblysynyń Shahan kentinde kópqabatty úıdiń bir bóligi qulady. Úıindiniń astynda 9 adam qaldy. Onyń 3-ýi balalar. 6 adam qutqarylyp, eki zardap shekken azamat aýrýhanaǵa jetkizildi.