«ArselorMıttal Temirtaý» metallýrgııa kombınatyndaǵy órt qurbandarynyń sany úshke jetti

Qaraǵandy oblystyq TJD-niń órtke qarsy jáne apattyq-qutqarý qyzmetinen habarlaǵandaı, búgin tańerteń Temirtaý aýrýhanasynda kombınattaǵy órtti aýyzdyqtaýǵa qatysqan ekinshi órt sóndirýshi qaıtys boldy.

«Búgin, tańerteńgi 9:40-ta «Órt Sóndirýshi» AQ fılıaly №14 órt sóndirý bóliminiń qaraýyl bastyǵy Roman Balabashın qaıtys boldy. Úsh táýlik boıy dárigerler qoldan kelgenniń bárin jasady, biraq, ókinishke qaraı, jaraqattary tym aýyr boldy», - dep atap kórsetti vedomstvonyń baspasóz qyzmetinen.

Esterińizge sala keteıik, 15 mamyr kúni saǵat 14.30-da «ArselorMıttal Temirtaý» AQ-nyń agloóndiristik tsehynda domna peshine shıhtany jetkizip turatyn konveıerdiń lentasy órtendi. Órttiń taralýy saǵat 17.55-te toqtatyldy.

Órttiń saldarynan «ArselorMıttal Temırtaý» AQ-nyń agloóndiristik tsehynda jumys istegen 45 jastaǵy mashınıst jáne №14-inshi órt sóndirý bóliminiń 40 jastaǵy órt sóndirýshisi kóz jumdy. Al órt sóndirý bólimi qaraýylynyń 32 jastaǵy basshysy zardap shekti, ol 90 paıyz kúıik jaraqattarymen aýrýhanaǵa jetkizildi.

Metallýrgııalyq kombınatta tótenshe jaǵdaıdyń sebepteri men jaǵdaılaryn anyqtaý boıynsha arnaı memlekettik komıssııa jumys isteýde. Adamdardyń ólimi boıynsha QR QK-niń 256-baby 1-bólimimen qylmystyq is qozǵaldy.

Aldyn ala boljam boıynsha, órt ystyq aglomerattyń konveıerlik lentaǵa túsýinen oryn alǵan.