«ArselorMıttal Temirtaý» merdigerleri ereýilge shyǵyp, qaryzdaryn ótep almaqshy
QARAǴANDY. QazAqparat - Qaraǵandy oblysynyń Temirtaý qalasynda «ArselorMıttal Temirtaý» AQ-nyń merdiger uıymdarynyń biri zaýyt basqarmasy ǵımaratynyń aldynda ereýil jasamaqshy, dep habarlaıdy «QazAqparat» HAA tilshisi.
«ArselorMıttal qazirgi tańda bizge 45 mln teńge qaryz. Bul - 2016 jyldyń qazanynda kórsetilgen esep. Kompanııa qol qoıylǵan aktilerge qaramastan, jasalǵan jumystyń aqysyn tólemeı otyr. Bizdiń hatymyzdy elemeı, bir jaýabyn bermeýde», - dep aıtty «Qazaqstan temir jolshylar toby» JShS basshysynyń orynbasary Ardaq Tersebaev.
Shyǵys Qazaqstan oblysyndaǵy kásiporyn transport joldaryn jóndeý boıynsha qyzmet kórsetýde. JShS ókiliniń aıtýynsha, olarda 200-den astam adam jumys jasaıdy.
«Biz Temirtaý qalalyq ákimdigine beıbit ereýilge ruqsat berýin ótindik. Bizge «ArselorMıttal Temirtaý» ǵımaratynyń alańy ereýilge arnalǵan oryn emes dep jaýap qaıtardy. Alaıda, biz sheginbeımiz», - dep málimdedi A. Tersebaev.
Bas tartýdyń sebebin Temirtaý ákimdiginen surastyrdyq.
«Ótinish erejege saı rásimdelmegen. Naqty orny, kúni, ýaqyty kórsetilmegen, - dep pikir bildirdi qala ákiminiń baspasóz hatshysy Olga Gorıacheva. - Naýqandy ótkizýge arnalǵan eski qalada resmı ruqsat etilgen aýmaq bar. Al zaýyt basqarmasynyń aldynda qarastyrylmaǵan (ereýilder, mıtıngter)».
Temirtaýdaǵy kásiporyn jáne qyzmet kórsetý qyzmetkerleriniń táýelsiz kásipodaǵynyń málimetine súıensek, «ArselorMıttal Temirtaý» AQ 18 merdiger uıymǵa 700 mln teńgeden astam qarjy qaryz bolyp qalǵan. Qansha ret bul másele kóterilse de, áli sheshimin tappaǵan, dep atap ótti kásipodaqta.
